Jowai: Ka yung bichaar Meghalaya High Court ynne ka sngi da pynmih hukum ko wa ki 50 ngut kiwa sikai kiwa chah jied kam ki Assistant Teacher ha ki Lower Primary School ka sorkar kiwa da chem ka takit ka CBI kamjooh ka High Level Scrutiny Committee wa chah jied ki deiwa khooid toh u pteiñ ki yei kreh yong ki ym toh u haap yaleh biang ki sa chisein ya ini i kreh.
Ka yung bichaar da ong ko leh wa i phah kreh ya ki yow lait donhi u duna kiwa sikai hadien wa da pyndam ya waroh kiwa chah jied ha kani ka kaam man ko kawa bakla.
Da kylli ko leh wa na iyi i daw haap chah pynchitom ki hawa ym em leh bakla ki wei da kreh ki ya ini i kaam da boon snem wei ye u em na ki toh kiwa da palat rta, kiwa da dep bia kiwa da em khon wei em ki i hok wow maad yow soh wa mih nei kreh chitom ki, wei lada pyndooh kaam ya ki da man ko kawa pyrchah ya ka kyndon Article 14 ka Constitution ka ri.
Kamtæ ki em ki ka hok wow pteiñ yei kreh yong ki ym toh kam ka “Stop-gap arrangement until fresh selection takes place” namo u kreh ki hadooh wa khut yaleh kreh thymme wei ka tulop wa kiwi ki myntoi u yoh hi ki kamwa da Advertise kreh.
Kani ka hukum da pynmih heiyatoh wa ka mukotduma ka All Meghalaya Primary School Teachers Association & ors pyrchah ya ka State of Meghalaya & ors.
Kam wow pynkynmoo kani ka jied Assistant Teacher da mih ki mukotduma wa boon kiwa da poi wot chadooh ka Supreme Court hadien wa em kiwa sikai da chah pynkylla ki Marks yong ki deiwa biah sia lieh heiwa ka Supreme Court da phah ko ya ka Meghalaya High Court yow chim ya ka rai wa khaddooh wei da pynman ya ka takit hajrong ini da ka CBI.
Na ki 50 ngut kiwa boon toh na Dadenggre Center wa Tura Center heiwa na Shillong da em 4 ngut katwa na Jowai da em kawi donhi.
Also Read: Pyndam ka Meghalaya High Court ya kiwa sikai wa chah thung dei sia lieh
Also Read: Kiwa yoh kreh kam kiwa sikai skur dei thok; ymye de ki u yaleh kreh sorkar: Meghalaya HC
Discussion about this post