15 49.0138 8.38624 1 0 4000 1 https://wyrta.com 300 0
Advertisement ad1
Advertisement ad1

Kiwa yoh kreh kam kiwa sikai skur dei thok; ymye de ki u yaleh kreh sorkar: Meghalaya HC

0 Comments
Advertisement ad1
Advertisement ad1
Advertisement ad1

Jowai: Ka thung kreh Assistant Teacher ha ki skur sorkar kiwa tip kam ki Lower Primary School ha u snem 2008-2009 da poi ko cha ka yungbichaar hadien wa em kiwa ym em yoh kreh wym sñiawhun ki yei rukom thung kreh wei da suba ki wa da em i leh be-aiñ ha ini i thung kreh.

Ka yungbichaar ha ka 21.10.11 da phah takit ko ya ini i kaam ha ka CBI wei ha ka 05.03.2012 da pyndep ko ya takit we da e kti ko cha yungbichaar yeiwa chem ko.

Advertisement ad1
Advertisement ad1

Tangwa hadien wa mih won boon ki mukotduma hei yatoh wa ini i jooh i kaam da chim won ya ka rai wa ym emkaam u pynman ya ka takit da ka CBI wei ym em hi leh u kyntait yeiwa chem ka CBI wei da e kti cha ka Committee wow chna da u Principal Secretary ka jylla ka wow pynman ya ka takit neibynta ka sorkar.

Kamtæ da chna da ka High Level Scrutiny Committee (HSLC) wei neiliang yong hadien wa pyndep ko ya ka takit da ong ki wow pyndooh kreh noh ya kiwa thung be-aiñ, u thung kreh ya kiwa toh hok wow yoh wei wow pynneh hi ya kiwa yoh kreh dei hok.

Hadien ini 246 ngut kiwa sikai da pyndam noh ya ki ha u bnai Thohlakhmi (Feb) 2014 tangwa kini kiwa chah pyndam won da thooh yarap ki na ka Supreme Court deiwa e ki da ka Special Leave to Appeal (SPL) heiwa ka Supreme Court da ong ko wa i takit ka CBI ym em wai ya ka wei dang chong ko hapoh ka Envelope nadooh wa e kti ka CBI cha ka Meghalaya High Court wei emkaam wow pait biang leh yei chem ka HSLC kamtæ da phah biang ya ka Meghalaya High Court wow chong bichaar biang ko ya kani ka mutkotduma deiwi tawan.

Ha i chong bichaar thymme ka Meghalaya High Court da ong ko wa da chem ya chiboon i rukom wa e marks ha ka Personal Interview i wym biang i wym em bood katkam ki kyndon heiwa ya kiwa dang sikai dang du chisnem da e 9 mark heiwa full mark toh 7 mark. Em won kiwa ym jooh em hikai ki tangwa da e marks ya ki 10. Da chem leh ya iwa ban arsien hawa thoh ya ki marks ha kiwa boon ki thaw.

Ka yungbichaar leh da klam ko yei chem ka CBI ha i takit yong ka heiwa ki bru wa da booh ka sorkar wow pynman ya ka Interview pher ki ha i por wa pynman ya ka Interview.

Kiwa pynman ya ka Interview da ong ki wa ym kylla ki ya ki marks wei che bha i thoh ki wei da sñiawphylla ki yei em wa kylla ya ki marks deiwa ban arsien kamjooh u pynemkaam da i sia lieh.

Manda poi ka takit ha u J.D. Sangma uwa man kam u Director ka DEME kawa tip katni kam ka School Education & Literacy da phla u wa ka Montri ka tnat puræ puthi ha itu i por ka Ampareen Lyngdoh da pha kylla ko ya ki marks ha waroh ki 5 tylli ki center wa pynman interview deiwa pynemkaam da i sia lieh wei da e leh ha oo ya i pyrtuid kiwa yaleh kreh wow pynheh marks ya ki.

Da chem leh wa 37 ngut naka Jowai Center da phah thung kreh u R.C. Laloo, uwa ksoh ha itu i por kam u Minister of Agriculture, Forest & Environment, 30 ngut da phah u Sniawbhalang Dhar uwa man kam u Parliament Secretary, 3 ngut da phah u F. War, Advisor u Chief Minister katwa u Moonlight Pariat, MDC, Jaiñtia Hills, Meghalaya da phah thung u 11 ngut.

108 ngut won na Shillong Center da phah thung kreh u Ronnie V. Lyngdoh, MLA, u Remington Pyngrope, Parliament Secretary, u Charles Pyngrope, uwa man kam u Speaker, u Sanbor Shullai, MLA, Dy. Speaker, u Prestone Tynsong, MLA, u A.L. Hek, MLA, u Don Kupar Massar, Minister of Excise, u J.A. Lyngdoh, Minister of Food & Civil Supply wa u L. Malngiang, MDC, Dy.Chief Executive, Khasi Hills Autonomous Council, Meghalaya

29 ngut won na Amlarem Center da phah thung kreh u P.L. Tariang, Ex-MLA, Co-Chairman, State Dev. Reforms Commission,

3 ngut won na Tura Center da phah thung kreh u Limison D. Sangma, Minister of State, 34 ngut na Dadenggiri Center da phah thung kreh u Limison D. Sangma, Minister of State.

Na kini waroh boon toh da thung ya ki kam ki Assistant Teacher ha ki L.P. School.

Hei yatoh won wa i takit wa pynman ka HSLC ka yungbichaar da chem ko ya iwa boon i duna heiwa da ong ko leh wa ym em i kylla ya ki marks wei hei thaw wow thooh ko yei hok da pyrchang pathan ko wow tymmoh ya iwa jia sakhiat.

Kamtæ ka yungbichaar hadien wa da chong pyrkhat bniah ko ya ini waroh da ong ko wa nadooh wa sdang ym em khooid i pynman ya ka thung kreh Assistant Teacher iwa da pynwit ki bru wa em hei bor kamtæ da pyndam noh ya kani ka kaam waroh wei du kiwa yoh kreh dei hok (katkam wa chem ka CBI waka HLSC) dang ye u ki kreh kat wym pynman da iwi tawan i khut kreh da iwa thymme, katwa kiwi kiwa da mih pyrtuid kiwa yoh kreh dei leh thok hap dam noh ki chi syndon lada dang pteiñ ki u kreh.

Ha ka yalehkreh thymme, kiwa da thung kam ki Assistant Teacher katni, haap yaleh kreh biang ki deiwi tawon wei lada em na pyrdi yong ki kiwa da heh rta leh ye hi ki u yaleh biang ya ini i kreh sorkar.

Ya kiwa mih pyrtuid ha ka CBI wa ka HLSC kam kiwa ym em khooid i yoh kreh ki, da e por ya ki 30 sngi wow yasaaid ki hakhmat ka Committee wow chna u Chief Secretary wei kani ka Committee hapoh 60 sngi daw e ko ya ka rai wa kini kiwa yasaaid da man ki kiwa khooid wei ye biang ki u yaleh ya ini i kreh.

Tangwa lada chem wa kiwa wan yasaaid man ki kiwa da leh tooh leh bakla ym chah de ya ki wow yaleh kreh sorkar chi rta yong ki wei ye u chah daiñ kuna T. 50,000 ka wow lai cha ka State Disaster Management Fund.

Da phah biang leh ya ka CBI wow pynman ko ya ka takit wa thymme wei u pyndep ko ya ka takit hapoh 6 bnai wei u e kti ko yei wa chem ki cha u Chief Secretary ka jylla.

Advertisement ad1
Advertisement ad1

0 Comments

Leave a Reply