Ka Meghalaya khlem da yooluti da ye ko wow pynrem ya ka Bihar ha ka Ranji Trophy da 4 Wicket wa da pynman ha madan ka MCA ynne ka sngi.
Ka Bihar da sdang ko ya ka sngi wa le da 73/3 deiwa tam da 170 Run tangwa kiwa kawang bol ka Meghalaya da leh ki deiwa sahkynmoo wow pynhaap ya 7 tylli ki Wicket deiwa e du 26 Run heiwa kiwa Bat ka Bihar da haap lut ki deiwa kamai 99 Run yow booh thong ya ka Meghalaya 197 yow jop.
Ka Meghalaya da ye ko wow poi thong deiwa lehbha u Swarajeet Das uwa da kamai 81 Run. Da ini i jop ka Meghalaya da yoh ko 19 Point wei ka Bihar 10 Point iwa da pynku ya ka Meghalaya cha ka Elite Group ha ka samoi wow wan.
Hachwa ini, ka Bihar da kamai ko 264 Run ha ka Innings wa nyngkong heiwa ka Meghalaya da jubab ko da 167, iwa chah ieh da 97 Run. Wa ini da man ko la ar sien ha ki le tylli ki yalehke wa ka Meghalaya da chah pyntam ko ha ka Innings wa nyngkong tangwa da wan ko nadien wow jop ha kani ka samoi ka Ranji Trophy.
Ynne na kiwa kawang bol wa da ktah bha ya ka Bihar toh u Abhishek Kumar uwa da yoh 4/41 heiwa ynnin da yoh u chi Wicket heiwa ynne da yoh u le tylli.
Ka Meghalaya kattu daw yachem ko waka Arunachal Pradesh ha Anand, Gujarat nadooh ka 3 tarik u snem thymme.
