Ka Tympang Club Jowai kawa man ka Club wa nyngkong dooh ha sor Jowai kawa da seiñ nadooh u snem 1901, wei kawa man leh ka thaw pyrdi wa nyngkong dooh ha Jowai, heiwa yung krehkaam sorkar wa rap emkaam tam leh kam ka yong u Deputy Commissioner wa ka JHADC em ki ha kani ka thaw, kamtæ ha ka 17 tarik uni u bnai da sdang ko yei lehkmen dap 125 snem yong ka ha madan Tympang Club.
Ha kani ka sngi sdang lehkmen, u Wailadmiki Shylla, Montri sorkar, uwa man leh u MLA ka thaaiñ da wan emlang u kam u kongsan wow wai pyrda ya kani ka lehkmen deiwa emlang u Thombor Shiwat CEM ka JHADC kam u symbood kongsan, chirup wa Moonlight Pariat, EM ka JHADC, ka C. Lyngdoh Dy. SP WJH, ki waheh chnong na ki chnong waphær ka Jowai, kiwa chah khut sñiawbha wa kiwi.
U Wailadmiki Shylla hawa klam da e khublei wei yaroh u ya waroh ki dkhot ka Club kiwa da embynta nadooh wa sdang wa kiwa katni neibhah i lai luti ya u moomær wa 125 snem ymtoh iwa suk.
Hawa klam da pynsñiaw haroh u ya ki kaam pynroi kiwa da ye u wow kreh pyndep hadien wa chah jied u kam u MLA, wa kynthup nadooh ki kaam wa sahteiñ da ki phaw snem chirup wa wa ki kaam wa thymme.
Da pynsñiaw u leh ya kiwi won ki kaam pynroi kiwa dang lai chakhmat i pynkreh najrong kiwa da mang thymme hapoh ka Jowai Constituency.
Pyntip u wa neibynta ka Kiang Nangbah Stadium Jowai dadep mang Rs. 6 klur tam yow chna ki Sitting Gallery, neitæ ka Rs. 17 klur tam yow chna Artificial Athletic Track najrong wow siang thymme ya u Artificial Turf wei u chna yaka VIP Gallery katkam ka juk katni.
Neitæ ki Scheme pynroi hapoh ka sor Jowai lyngba ka chnat Urban kattæ da ye u pynku boon chah cha ka Rs. 5 klur chi snem neiwa jooh yoh du Rs. 30-40 lak, heiwa kani u ye yarap ko chiboon heiyatoh wow chna pynmiat pynbha hapoh sor Jowai.
Pyntip haroh u wa ka chnat Urban dadep pdiang ko heiyatoh wow e yarap ya ki manyung wa dooh hapoh sor neibynta i chna yung wei lyngba kani leh yooluti u wow man i yarap i myntoi bha ya ki bru wa dooh.
Neitæ chibynta yong kani ka lehkmen 125 snem ka Tympang Club, u Wailadmiki Shylla da kular u wow e yarap Rs. 10 lak, heijooh i por leh kular u wow chna pynbha ya ka madan ka Tympang Club wei wow booh leh ki bordiñ soodong ka madan khnang yow yoh lehke heipor miet leh.
Chwa ini da yoh i klam pynche hajrong ka parom ka Tympang Club na ka R. Lyngdoh (Retd. IAS), wa kammon da e pyrtuid won da ka Ïawmusiang, najrong kiwi de kiwa klam.
Da em leh ka yalang pynkup burom ya kiwa yahkhmat warim ka Club kiwa da khlaad heiwa da pdiang da kiwa ha-yung ha-sem yong ki.
Da pynchongchit chooh chooh ya kani ka lehkmen da i chaad i rwai wa da chimbynta da ki khon ka Club, ka Seiñraij Jowai wa kiwi.
Discussion about this post