U Wailadmiki Shylla kam u Montri sorkar uwa man leh u MLA ka Jowai, ha ka 2 tarik uni u bnai hawa embynta kam u kongsan ha ka yalang Graduation Day ka Thomas Jones Synod College Jowai, da pynbna u wow e Rs. 10 lak neibynta i emkaam kani ka College heiyatoh wow pynbiang ki kor Computer.
Katwa neibynta kiwi won kiwa emkaam wa da pynsñiaw ki bor pait bor pynlai kani ka College, ong u kamwa oo hi sñiaw tre u ya kani ka College, khut u leh i yakrehlang chirup nadooh ka Principal, kiwa sikai, ka Governing Body wa kiwi yow yakrehlang u thooh sa kiwi won ki laad yarap neibynta kani ka College ym u ieh du oo samen u litoor lithooh.
Hawa e khublei won ya ki khynroo khyllood wa da pyndep ya ka Graduation wei chah pynkup burom ha kani ka sngi, u Wailadmiki ong u wa kani man i sdang yong i lai luti thymme yong ki hei im, deiwa pynchlur leh ymtoh u dooh kyrmen hawa maad ya iwon iwon i chah rem hei lai luti.
Kyntu haroh u ya ki wow chaniah ya idæ, u chim i kitkhlieh neibynta ka mynried yong ki, najrong wow chim kabu leh ya kiwon kiwon ki laad wa yoh.
Heijooh i por leh ymtoh u chaniah næ yang beit yei kreh sorkar, tangwa toh u pynpliah leh ya jar jiar i sap wa em khnang yow man i khih i khan ya idæ wei wow e khih leh ya kiwi, deiwa pynkynmoo leh yei boon kiwa dep Graduate man-u-snem ymtoh de iwa ke katwa i em ki kreh sorkar wa lait won duna bha.
Ha kani ka sngi da pynkynmoo haroh u yei lai luti yong oo chirup wa kiwa sikai, ki bor pait bor pynlai kani ka College hei wow yakhun pynyoh i tipmit ya kani ka College hapoh ka People’s College heipor ka sorkar MDA-I wei kamwa man katte 24 tylli ki Post hapoh kani ka College da su da ka sorkar.
Kiwi won wa klam ha kani ka sngi kynthup ya ka Principal yong kani ka College, ka Dr. Ailynti Nongbri, u Rev I.U.B. Pala uwa man kam u Chairman ka Governing Body, u B.N. Lamare, Chairman Christian Education Department KJP Synod Mihngi wa kiwi ha ka yalang wa pynlai da ka C.D. Tongper Head of Department of Economics.
Neiliang ka College ha kani ka sngi da pynkup burom kyrpang ko leh ya ki khynroo khyllood wa pyndep yei puræ yong ki kiwa em 220 ngut deilang kiwa lehbha ha ki Department waphær waphær chirup ha ka Result Higher Secondary School Leaving Certificate wa ha i lehke Sports.
Discussion about this post