Ha ka yalang yong ka District Road Safety Committee wa da khut pynman da u MLA ka Jowai, u Wailadmiki Shylla ynne ka sngi ha Hall ka Highwinds Thadlaskeiñ wa haap hapoh ka chnong Mukhla neibynta u ya pyrkhat yei chngaaiñ i lai i wan ki kari ha sarok kamjooh ki paidbah wa lai luti heiwa da emlang nadooh ki bor District, ka yung krehkkam u DTO, ka chnat pulit, ka chnat PWD, ka chnat i chait i khiah, kiwa yahkhmat chnong ka Mukhla pyllun, neiliang u MLA hawa klam cha kiwa thoh khubor khana u wa da emlang leh kiwa ha-yung ha-sem yong kitu kiwa da khlaad nei jia tyrrah kari ha Thadlaskeiñ ha ka 21 tarik uni u bnai.
Ha kani ka yalang khana u wa najrong i yachem yaphyllu wow booh pynyoo ki dak ki chin ya ki kari yoh ki u pynjem dang na jngai chwa u poi hei thaw wa booh i maa, da yoh ki leh wow pyntip cha kiwa ha-yung ha-sem kitu wa da khlaad hajrong ka Scheme e yarap ka sorkar jylla kawa Rs. 2 lak cha kiwa yap wa Rs. 50,000 won neibynta kitu wa mynsoo malu mala wei ini chong katkam i ye yong ki u pynbiang ya ki kot ki sla.
Hawa kyntu ya ki paidbah wow chim ki ya ki laad yarap na ka sorkar lada jia maad ki yei mynsoo ha luti syngkieñ, da pynkynmoo haroh u wa nyngkong hi mar ya jia toh u pyntip cha ki pulit khnang yow yoh ki u leh yeiwa emkaam.
Heijooh i por ong u wa neini chakhmat u kyntu u ya ka District Road Safety Committee wow pynman ko i pynche paidbah neipor cheipor khang wa ki paidbah u tip ki kammon u syndong wei wow yoh ki laad yarap na ka sorkar.
Kam wow pynkynmoo hajrong iwa jia tyrrah kari, ka manbei wa chah tyrrah deiwa bah wa u khon wa dang ar snem uwa da khlaad noh ha ini wa jia, hadooh kattæ kani ka manbei dang em ko hapyrdi i chitom joor.
Uwa yah ka Truck won uwa da yut ha katai ka sngi ym pu em chem ki pulit oo hadooh kattæ leh.
Discussion about this post