Kam chibynta wow pynkut ya ka Lathuthiñ Festival 2024 ynnin ha Tuber Shohshrieh, da em chiboon kiwa da wan pynwyrngia nadooh kiwa rwai wa tem, ki DJ wa kiwi de wei da pynman leh yei yakob jied klong Plastic heiwa ya kiwa jop da e da ka song poisa.
Kani ka tamasa da pynman kam chibynta wow pynneh pynsah ya ka dustur riti kamjooh wow yada ya ka ramaw, kamtæ ynnin heipor sngi da kheiñ ya ki klong wa da pynlang kiwa da chimbynta ha kani ka yakob jied klong Plastic.
Ya kani ka yakob da pynbna nadooh ka 1 tarik u Naikhynde uni u snem heiwa kiwa kwah u chimbynta kiwa ye u em heiwon heiwon ye ki wow pynlang klong Plastic kamjooh kiwi ki yusong baam Plastic næ kiwon kiwon ki jait Plastic wei da thap lang ki hapoh kini ki klong.
Na kiwa da chimbynta da yoh nyngkong u Bud Sana uwa na Tuber Kmaishnong uwa da jied 1046 tylli ki klong kiwa dapoi 523 lt wei da yoh u leh ya ka song poisa kawa Rs. 20,000.
Hei wa ar da yoh ka Kongka Rymbai kawa na Tuber Shohshrieh kawa da jied 662 tylli ki klong kiwa dapoi 331 lt wei da yoh ko ya ka song poisa kawa Rs. 15,000.
Hei wa le da yoh ka Syntu Shylla kawa na Tuber Shohshrieh kawa da jied 608 tylli ki klong kiwa dapoi 304 lt wei da yoh ko ya ka song poisa kawa Rs. 7000.
Neiliang kiwa pynman ya kani ka tamasa da pyntip ki wa manda pynman biang ya kani ka tamasa mynried u snem daw pynku ya ka song poisa chadooh Rs. 1 lak yow pynchlur ya ki paidbah wow pynman ya ki chnong ki thaw kiwa khooid wa jngiar kiwa lait na ki Plastic wei ye ki wow sdang u pynlang Plastic nadooh kattæ.
Discussion about this post