U Union Home Minister, u Amit Shah da kular u ya ki seiñ kieñ suloi ka Tripura kiwa kynthup ya ka National Liberation Front of Tripura (NLFT) waka All Tripura Tiger Force (ATTF) wa ka sorkar u bood ko ya iwi pa iwi i kyntien hadooh u Comma wa u Full Stop wa em ha ka soskular yaksuk kawa da yasoi ha ka 4 tarik uni u bnai.
Ya kani ka soskular yasuk da yasoi ha Delhi hapyrdi ki le liang heiwa u Amit Shah da ong u wa ka sorkar kreh ko yow wanrah yei roi i paar ha ka thaaiñ North East ka ri khamtam neibynta ki jaitbru ri-loom wow pynneh pynsah ya ka dustur riti ki, u ktien thylliej wa i rukom im ki.
Da ong u leh wa u PM Modi kwah u pynyabi ya ka Nort East waka Delhi lyngba u sarok, ka rel kamjooh da ki lieñsuiñ.
Heiyatoh wa kani ka yasoi soskular da ong u wa kani u man ko u moomær hapoh ka jylla Tripura yow lai luti chei suk i saaiñ.
Ka NLFT waka ATTF da kani ka soskular da mynjur ki wow pynkut noh ya kani ka yakhih ki kawa la 35 snem kattu deiwa uiñ biang cha ka imlang sahlang.
U Amit Shah da ong u wa hapoh i yahkhmat u Modi dadep wow ya soi 12 tylli ki soskular yow yasuk heiwa 3 tylli toh ha Tripura wei waroh da em 10,000 ngut ki bru kiwa da wan pyndem ya ki tiar yaleh deiwa yasoi soskular.
Da khana u leh wa ha kini ki ar tylli ki seiñ wa kattæ, da em palat 328 ngut kiwa da ieh noh ya ki tiar yaleh wei ka sorkar da booh ko Rs 250 klur yow wanrah ya ka roi ka paar ha ki thaw wa yakhih kini ki seiñ kiwa boon toh ki thaw ki jaitbru ri-loom.
I yaklam yasuk toh iwa da pynman la chi snem ha Guwahati wa ha Delhi heiwa kiwa yahkhmat kini ki seiñ da e luti u lai u wan ki deiwa suk na Bangladesh kamjooh wow liwan biang ki.
Discussion about this post