Kam chibynta wow kyrchaan ya kiwa em sap wow chna phlim wei wow pynheh pynsan ya kani ka kaam, neiliang u Montri Rangbah ka jylla, u Conrad K. Sangma da saam u ya ki Grant cha kiwa chna phlim hapoh ka Hello Meghalaya.
Kani ka Grant toh kawa da yabhah ha ki 4 tylli ki Category kitæ ka A, B, C wa D.
Hapoh ka Category A, daw jied ya 6 ngut kiwa chna phlim deiwa e hadooh Rs. 35 lak yow pynmih kawi ka Feature Film hapoh chi snem.
Hapoh ka Category B won daw em 18 ngut kiwa chna phlim kiwa daw yoh hadooh Rs. 25 lak yow chna Feature Film.
Hapoh ka Category C daw jied ya 4 ngut kiwa chna phlim ki wow yoh Rs. 20 lak yow chna Web Series deiwa pynmih 10 Episode kiwa jrong 30-40 minit kawi.
Hapoh ka Category D u jied 19 ngut kiwa chna phlim kiwa dang sdang ki wow yoh Rs. 5 lak yow chna ya ki Short Film.
Ha kani ka yalang da pynbna leh ya ka Filmmaking Exchange Programme deiwa ya krehlang ka Meghalaya Tourism wa ka Film and Television Institute (FTI), Arunachal Pradesh heiwa daw jied mar 15 ngut kiwa lai puræ na Meghalaya wa Arunachal Pradesh yow yoh ki ya ka Masterclass na u Dominic Sangma uwa chna phlim wa pawnaam ka Meghalaya.
Da pynlait leh ya ka Draft Meghalaya Film Tourism Policy 2025 yow pynchlur ya kiwa na baar ka jylla wow wan chna phlim ki hapoh Meghalaya wei ya kani ka Draft ye u pait ha ka Website ka Meghalaya One wei ki paidbah ye ki wow pynsñiaw heiyatoh wa kani hadooh ka 20 tarik uni u bnai.
Kani man ko leh kam chibynta wow pynpawnaam ya ka Meghalaya kam ka thaw wow riñ phlim yow yarap ya ki kaam uiñke suwari kamjooh leh yow pynkupbor ya kiwa em sap napoh ka jylla wow chna phlim deilang kiwi de kiwa emkti ha kini ki kaam.
Ka sorkar u yarap poisa ko hadooh Rs.1.5 klur ya kiwa wan chna phlim hei ktien Hindi, Tamil, Telugu, Malayalam, Kannada wa Marathi.
U e leh ki Grant wa Subsidy ya kitu kiwa pynyoo yei thaw wa man kyrpang, ka riti dustur wa ki thaw uiñke suwari ka Meghalaya.
Neibynta kiwa napoh ka jylla daw e sikai ki leh yow pynpliah yeiwa tip ki. U pynchlur leh ya ki bru samen wow chna ki ya ki Studio, Labs wa kiwi de wow yarap hei chna phlim.
U Conrad da pyntip u leh wa da em i tyrwa wow booh ya ka Film Institute ha Meghalaya wei wow pynman ya ki Film Festival ha Tura wa ha Jowai ym du ha Shillong donhi.
Discussion about this post