U Montri ka chnat i chait i khiah, u Wailadmiki Shylla, ynnin hawa klam ha ka yalang saam ya ki tiar wa emkaam cha ki thaw e sumaar waphær ka West Jaiñtia Hills District wa ki tiar wa emkaam cha ki Anganwadi Centre nei yarap poisa ka Power Finance Corporation Ltd. lyngba ka Corporate Social Responsibility (CSR) ha Auditorium ka District Library, Jowai, khana haroh u wa najrong i thmu ka sorkar u pynboon kiwa kreh ha ki thaw e sumaar waphær waphær wei wow pynbiang ki tiar wa emkaam, ka sorkar da mang poisa ko leh kamwa Rs. 53 klur neibynta u pynku kyrdan ya ka Ummulong CHC cha ka Integrated Hospital heiwa ki thaw thiah u ku ki sa 50 tylli wei ini daw yarap i yow lait khynnia ha Jowai Civil Hospital.
Neitæ pyntip u leh wa da mang u pynheh ya 3 tylli ki Civil Hospital ha ka jylla, kitæ ka Shillong Civil Hospital, Tura Civil Hospital wa ka Jowai Civil Hospital ha ka mang poisa wa duna Rs. 500 klur i pynlut.
Ya kani da mang hajrong ka thong yow rap ye chooh chooh u e ki laad yarap cha ki paidbah khnang yow lait ki u lai cha kiwi won ki thaw e sumaar wa rap biang.
Heijooh i por leh khana u wym slem de ha Jowai Civil Hospital u yoh noh ya ka MRI heiwa dadep khut Tender wei yooluti u sa du kattu katni bnai ka kor dapoi hi ko.
Ong haroh u wa hanla hapyrdi boon i duna wa i eh wa maad, i yakrehlang toh kawa emkaam khamtam na ki paidbah neibhah da sñiawthooh ha ka chnat i chait i khiah ym ye u kreh du ka sorkar næ du ki Doctor ki Nurse.
Kamtæ yooluti u wa dei ya krehlang u ye u pynku yei chait i khiah ha ka District wa ka jylla.
Discussion about this post