Kiwa dih sikret ha ki thaw paidbah da chah daiñ kuna ki hadooh ₹1.52 lak na ki 1,545 tylli ki chalan ha ki ar snem hapoh ka aiñ Cigarettes and Other Tobacco Products Act (COTPA), 2003.
Yeini da ye wow leh da ki pulit ka North Garo Hills Police yow pynkrehkaam ya kani ka aiñ kawa da khang yei dih sikret ha ki thaw paidbah kamjooh wow dai ya ki duma ki sikret ha ki thaw wym chah. Wei ini wa ye ki pulit ka NGH wow leh man ko kawi na kiwa boon dooh i daiñ kuna hapoh ka jylla.
Ini iwa boon toh iwa da lai daiñ kuna ha ki thaw paidbah wa ha ki dukan wa dai duma, biri, sikret wa em hajan ki thaw puræ wei iwa boon dooh i daiñ kuna man i kamni:
– Wageasi OGC – 259 tylli ki chalan, ₹30,050 ka kuna
– Mendipathar WPS – 231 tylli ki chalan, ₹17,200 ka kuna
– Mendipathar PS – 218 tylli ki chalan, ₹31,600 ka kuna
– Rari OGC – 198 tylli ki chalan, ₹19,750 ka kuna
Neiliang u Superintendent of Police ka North Garo Hills da ong u wa ini toh i kreh chitom ki pulit waroh wei ka thong toh wow yada yei mynsien bru kamjooh yow pynman ya ka District kawa chait wa khiah neibynta waroh.
Kani waroh man ko leh kam chibynta ka National Tobacco Control Programme (NTCP) wa em hapoh ka Health & Family Welfare Department, NHM Meghalaya heiwa da pynman yei pynsñiawthooh paidbah wei da mih leh cha ki skur.
Ka Dr. Nabneeta D. Mawrie, State Nodal Officer ka NTCP Meghalaya da yaroh ko yeini wa da leh ki pulit deiwa ong wa i dih duma kamjooh i baam duma jooh wanrah ko yei kjut Cancer wei smat yap ki bru, wei ini wa yahluti ki pulit ka North Garo wow leh pyrchah toh u bood leh da kiwi ki District.
Uwi na kiwa dai dukan da ong u wa katni da duna bha u yoo ya ki bru wa dih duma cha ki yaaw ki haat iwa man iwa bha hawa pyrkhat khamtam yei chait i khiah ki khynnah.
Ki pulit ka North Garo Hills da ong ki wa daw sdang ki leh wow lai cha ki thaw wa em ki skur wa ki thaw wa em ki kari kamai yow leh yeini i jooh.
Puræ leh: Palat 1000 ngut kiwa da chah daiñ kuna wa dih sikret ha thaw paidbah
Discussion about this post