Ka Special Court yong ka Federal Investigation Agency (FIA) ka ri Pakistan ynne da e rai ko pyrchah ya u Prime Minister warim uwa man leh uwa sdang ya ka Pakistan Tehreek-i-Insaf (PTI), u Imran Khan wa ka kurim u Bushra Bibi wow chah kset ki hadooh 17 snem.
Ini i rai man i hajrong ka mukotduma baamtooh wa tip kam ka Toshakhana-II Corruption Case.
Ka Special Court da booh ko leh ya ka kuna wa Pakistani Rs. 16.4 Million (kamwa Rs 52.4 lak ka poisa India) samen ki wei lada ymye ki wow su daw hap pynjrong yei por wow chah kset ki.
Ka Special Court da sñiawkhia ko leh yei rta u Imran kamjooh wa ka Bushra Bibi kam ka kynthai kamtæ da rap pynjem ko ya ka rai.
Ya ka rai da puræ da u Special Judge Central, u Shahrukh Arjumand ha Adiala Jail, Rawalpindi ha i thaw wa kset ya u Imran.
Kani ka mukotduma toh hajrong i thied ya ki kpieñ ksiar Bulgari wa da e sñiawbha (State Gift) ya ka kurim u Imran Khan (ka Bushra Bibi) da u khon syiem ka Saudi Arabia ha u May 2021 tangwa u Imran da pynemkaam bakla noh u yei bor u wow thied duna dor ki heiwa da ong wa da phah u wow kheiñ duna dor ki. I tiar wa da e sñiawbha cha ka ri toh kiwa lai cha ka Treasury ka sorkar tangwa ka aiñ chah ko ya ki Politician wow thied ki.
Kini ki chi kurim toh kiwa da phah kset chwa 10 snem tangwa ya kini ki 17 snem wa dang phah kset thymme daw kheiñlang ki heijooh i por.
Discussion about this post