Jowai: Kam chibynta wow pteiñ yei lehkmen dap 50 snem ka Kiang Nangbah Government College, ynne ka sngi ka Cultural Committee kani ka College da pynman ki da ka Inter-College Cultural Competition hapoh ka auditorium kani ka College.
Ha kani ka yakop da yabhah ha ki le bynta ka yakop pynyoo riam tynre, ka yakop rwai phawar waka yakop rwai tynre yonglang.
Ha ka yakop pynyoo riam kiwa chimbynta da wan na ki 6 tylli ki College ka ri-loom Jaiñtia ka Kiang Nangbah Government College, Shangpung College, Thomas Jones Synod College, Jaiñtia Eastern College, Nongtalang College wa ka St. Anthony’s College Byndihati.
I pynyoo riam da em arngut kawi ka college kiwa pynyoo yei riam ki chynrang wa kynthai. Da yabhah ha ki le bynta heiwa nyngkong da pynyoo ya ki sula wa sap ha yung, wa ar won ki sula wa sap heipor wa lai khih katwa kiwa khadooh won toh ki riam wa kyrpang.
Da em leh ka bynta wa kiwa chimbynta da haap jubab ki yeiwa kylli kiwa bichaar hei yatoh waka riti dustur.
Hadien ini kiwa bichaar da yoo biang ki u jied ya kiwa mihkhmat ka Thomas Jones Synod College kam kiwa jop kiwa da mihkhmat ka Liberty Day Kyndiah wa u Braver Kelphung, wa ar da yoh ka St. Anthony’s College, Byndihati wa mihkhmat da ka Ridalin Nongtdu wa u Tyson Nongtdu katwa yei naam wa le da yoh ka Nongtalang College kawa mihkhmat da ka Purnima Myrchiang wa u Noondaystar Pohrmen.
Ha ka yakop rwai yonglang won da jop ka Thomas Jones Synod College, wa ar da yoh ka St. Anthony’s College katwa yei naam wa le da rah ka Jaiñtia Eastern College.
Ha ka yakop phawar won da jop u Shaniah Skhem Kharkongor naka Jaiñtia Eastern College, wa ar da yoh u Plielad Buam na Kiang Nangbah Govt. College katwa yei wa le da yoh Listerning Shadap na Kiang Nangbah Govt. College.
Discussion about this post