Hadien wa dadep lai booh ujor ha u DC ka East Jaiñtia Hills District neitæ won ha Meghalaya State Pollution Control Board (MSPCB), ynne won kiwa chong chong ka Shnongrim, Elaka Nongkhlieh da lai yachem ki sa wa u CEM ka JHADC, u Thombor Shiwat yow pynsñiaw yei pyrchah yei thmu pynman Public Hearing ka Shree Cement Ltd wow paan bor yow tih moochuni ha i thaw yong ki kam ki bru samen wa tip kam i Lum Syrman.
Katkam ka Notice wa da pynmih da ka MSPCB da e pyrtuid ya kani ka thaw kam ka Lum Syrman Village, Block-A heiwa neiliang u CEM da ong u wym em kam katæ ka chnong wei ym em leh kynmoo u wa e Sanad ya kani ka chnong.
Kiwa chong chnong hawa yaklam wa kiwa thoh khubor da ong ki wa lada lai bait kani ka Public Hearing wei lada jia iwon iwon, kiwa e bor e NOC wow leh yeini nadooh u Dolloi wa ki Executive Member daw hap ki wow bahkhlieh.
Kam wow pynkynmoo wa kiwa chong chnong da ong ki wa kani ka Lum Syrman toh kawa mantre da ki spah ngut kiwa chong chnong kiwa da pynemkaam ka yow rep nadooh ki por yong rim wei da biang ki leh ya ki kot wa da pynskem da u Dolloi wa da ka JHADC.
Kamtæ da e por ya ka JHADC ynñiaw sngi wow pyndam ko ya kani ka Public Hearing neitæ wow takit kammon da kam yeini i thaw ki bru samen wei wow pynchitom leh ya kitu kiwa emkti wow leh yeini.
Discussion about this post