Jowai: Ka JHADC kawa em hapyrdi i chitom poisa katni, dang kyrmen ko wow yoh chooh ya ka bhah yong ka na ka sorkar jylla kawa sah nadooh ki snem 2004-05, da ong u CEM ka JHADC, u Thombor Shiwat ynne hawa yarap jubab yeiwa kylli u Andrew Chullai na u Lasky Rymbai ha ka yung dorbar ka JHADC.
U Andrew da kylli u na u Lasky uwa man u EM wa pait ya ka chnat khloo ka Council heiyatoh wa ka bhah (Share) wa ka Council toh u yoh ko na ka sorkar jylla hadooh ka 31 Wisu 2020 wei hajrong ini u Lasky da jubab u wa ya kani ka bynta dang yaklam wa ka sorkar jylla katni.
Ini i jubab u Laskry da pynkhyrngiat i ya u Andrew uwa da pynrap yei kylli wa kammon ye u man kamtæ neibhah u CEM ha kini ki tayaw wa dadep da pyntip u cha ki laad pathai khubor wa ka Council dang toh u yoh ko sa kamwa T. 92 klur na ka sorkar kawa man ka bhah yong ka.
Heini da yieñ u Thombor wow pynche deiwa ong wa dang sah toh kamwa T. 93 klur tam wa ka Council toh u yoh ko na ka sorkar jylla wei ini man i katkam ki yukheiñ wa yoh ka yung krehkaam ka Council nadooh ki snem 2004-05 wei i daw hi wa kynjoh hadooh kat deini toh wa boonsien ka sorkar jooh e ko ya ka poisa cha ka Council deiwa lang namo Lump-sum.
U Andrew da ban chooh chooh u deiwa kylli wa iyi leh ka EC hajrong kani ka poisa wa dang sah wei neiliang u Thombor da jubab u wa ka EC dei langær lai yachem ko ya ka sorkar wei hei sakhiat toh u chong yalang ha kani ka tayaw ha Shillong hapyrdi ka Council, ka District Council Affairs, ka Finance Department wa kiwi kiwi ya kawa da khut da u montri rangbah ka jylla tangwa neidaw ka Lockdown da hap pyndam chwa ya ka.
