Ka seiñ ki warep wa tip kam ka Myntdu Pynthorneiñ Farmers Welfare & Producer Organisation (MPFPO), ynnin ka 26 tarik u Wisu da saam symbe kba biang ko da uwa pyrtuid CAU R1 uwa da ye wow yarap bha ya ki warep wa man u uwa bha wa miat hadooh kattæ kattæ uwa da sdang wow rep nadooh u snem 2020.
Ya uni u symbe kba CAU R1 da yoh ki na u Prof. NB Singh ka College P.G & A.S, Umïam Ri-Bhoi District, ka Central Agriculture University, Imphal Manipur.
Da ong wa uni u symbe toh uwa miat uwa soh bha wot hapyrdi i joor slap joor la-ær kamwa jia haki snem wadep neibhah ha Myntdu Pynthorneiñ wa ha Mukhla da rep ki oo.
Chwa u saam ya uni u symbe kba CAU R1, da yoh i klam na u K.L. Pariat uwa man uwa yah luti yaka seiñ, heiwa da pynsñiaw u i sñiawngooh ya ki warep kba rep jhoor, kiwa man leh kiwa pynim yaka rymaw wei pynkhlan yaka wah Myntdu waka Tyrchi kawa tooid na chnong Khliehtyrchi cha ka wah Myntdu.
Ong u wot hapyrdi i chem chitom ki warep nei chah lehbeiñ ki hali wa noh taroi ki bru yaki jhep ki Plastic, najrong wym yoh yarap naka sorkar heiyatoh i chah ktah i thaw rep neibor pynjæd ka rymaw, kyntu u wow man kiwa yatylli neibynta u ye u pynkhlan chooh chooh yei kaam rep.
Da kyrpaad haroh u wow kiar i pynemkaam muna Plastic hawa lai yaw, yow ye u ya imlang waka rymaw tawiar ka wah Myntdu.
Heijooh i por da kyrpaad haroh u yaki bru u noh kyrpang yaki jhep wa pyut yow kylla sboh ki, wei u dam leh u noh jhep Plastic, ki klong cha chariñ wa kai cha ki hali iwa man i ma wa khroo ya ki paidbah.
Yaka yalang da pynlai da u Pynchngaiñ Rymbai, President MPFPO, katwa yow symbe kba da saam kamwa 70 kg cha ki 20 ngut ki warep da u Pyntngenlang Kyndait, General Secretary ka seiñ.
Puræ leh: Saam symbe kba ka MPFPO cha ki warep
