Jowai: Ynne kani ka sngi Pyngkat 23 Naitung 2018 ki bor pait bor pynlai ka Rud Myntdu SSA LPS ha ka thong wow yoh ki khynnah skur yei khooid i pliah hei long i man hawa wan ki cha skur, dei khia pyrkhat da chim ki wow pynman ya ka yalang saam tiar mynkna ya ki khynnah hapyrdi i sakhilang ki bei ki pa yong ki khynnah wa ki bru ka Sarva Shiksha Abhiyan (SSA).
Ha kani ka sngi chwa wow ekti ya ki tiar cha ki khynnah da em ka yalang yahkhmat wa tbian hei pynlai ka Head Teacher ka M. Pakynteiñ, heiwa da yoh yei klam i kape wei kyntien sneiñ kyntien kroo wa ki kyntien kyrsu kyntu ya ki khynnah na u Jr. Engineer, SSA West Jaiñtia Hills, u Daohi Manner, Sr. Accountant SSA, East Jaiñtia Hills u Aibor Syiemlieh wa na u dkhot ka School Managing Committee u Oriland Shylla.
Kini ki waheh hei klam yong ki da ban joor ki ya ki khynnah yei akor burom, i tyrna tyrjin yei kaamram kam ki khynnah skur wa yei leh khooid nadooh i pran samen hawa em ha skur, ha yung ha sem wa ha ka chnong ka thaw katwa ya ki manbei manpa wan da khut kysru kyntu ki deiwa ong, to yakrehlang wa ki bor pait bor pynlai ka skur kamjooh wa kiwa sikai na ki por cha ki por khnang yow ye u wanrah yei wamiat wabha tam ha kani ka skur kiwa man neibynta i myntoi wei miat i bha yong ki khon ki kti yong phi.
Ki tiar kiwa da saam cha ki khynnah ha kani ka sngi toh ka brut lamieñ, Colgate, yu ah tyrsim, thadlumar, yuchut, pliang baam ja wa kiwi kiwi kiwa yatoh wei puræ puthi yong ki. Ini i pyrchang wakhian yong ki bor pait bor pynlai ka Rud Myntdu SSA LPS toh man ko chibynta wow pynyoo da ki yaksohktilang wa ka Swachh Bharat Mission kawi na ki thong yong ka sorkar u montri rangbahdooh ka ri Narendra Modi heiyatoh wow wanrah yei khooid i pliah hapyrdi i long i man yong ki khynnah kamjooh wow e wyrta khubor chaphang i kordor yong i leh khooid.
Discussion about this post