U MLA ka 2-Jowai Constituency, u Wailadmiki Shylla ynne ka sngi da saam Work Order u cha ki 16 tylli ki chnong wa haap hapoh ka Thadlaskeiñ C&RD Block neibynta u chna ki ya ki Anganwadi Centre kawa haap hapoh ka Phase-X.
Ha ka yalang saam Work Order wa pynlai da u Dr. H. Niang, BDO ka Thadlaskeiñ C&RD Block wa pynman ha Hall BNRGSK Thadlaskeiñ C&RD Block, da yoh i klam pdiang na ka Violet Rose Talang, Junior Rural Development Officer Thadlaskeiñ Block wa i klam hajrong ka Anganwadi Centre na ka CDPO, ICDS Thadlaskeiñ ka D. Iakai.
Ka D. Iakai hawa klam pynche heiyatoh wa ka Anganwadi centre, ong ko nachwa da jooh tip kam ka yung e baam chana ya ki khynnah tangwa katni da phær ko neibhah da ye u yoh na ka i chakri wa boon jait deiwa em leh ar ngut kiwa kreh.
Da booh leh kawi ka Anganwadi Worker ka wow pait ya ka imlang sahlang wei yei chait i khiah ki khynnah heiyatoh wa i khia ki, i biang baam nadooh wa kha hadooh wa dap 6 snem kamjooh leh ya ki manbei punkhon, ki khynnah nadooh 14 hadooh 16 snem, katwa ka Anganwadi Helper won toh yow pynkhooid pynpliah ya ka Anganwadi Centre.
U Wailadmiki Shylla hawa klam kam u kongsan kyntu u ya ki chnong ki thaw wow sñiaw tre yeiwa e ka sorkar, deiwa yakrehlang leh heiyatoh i pynlai bait pynlai ryntih ya ki Anganwadi Centre khnang wa iwon iwon iwa e ka sorkar u man iwa myntoi.
Kamwa kani man ko leh ka yung wow pynbha pynmiat ya ki khon ki kti kamjooh ya ka mynried ka chnong ka thaw, kyntu u wow booddien yei man i long, i rukom krehkaam ki Anganwadi khnang yow tipsap u thooh laad u pyntoh pynbiang yei duna.
Wei kamwa ka jylla Meghalaya toh kawa kheiñkor ya ki manbei yooluti u wa deiwa bien ki chnong ki thaw u chimkhia kamjooh kiwa kreh ha ki Anganwadi Centre u ye wow pynduna i khlaad ki manbei heipor wa kha khon.
Discussion about this post