Da u Soolangki D. Laloo
Sadu iwa eh, wa eh,
Kyntien ki waheh,
Kai diñ chei kop wym kop,
Chei pleh wympleh.
Juk yi kam kani ma-ai?
Chilæm u pait yoo kamwa datam u bru yow Blai.
Waroh kat iwa mut wamang,
Wym yoh de kamwa thrang.
Aiñ bru nangmih ki sngi nang ku,
Aiñ Blai, yoo kam wow jem rngu.
Kat chawa pait sadu i pakhlat bait
Dukha yaamrem i sñiaw wow pait.
Tynjooh hi ma-ai, ini wa e u Blai?
Yow tip u sñiawthooh u bru pyrthai.
Yei khia i chon yow tip u thij u pyrkhat,
Hei longbru manbru deiwa syndong, antaad.
Aa! lada toh sakhiat i mon i khe u Blai
Yieñ i ngooh i dem dei kyrpaad wyrai.
Duhai kynrad, i eh i khor kamni,
Yaamrem u bru pyrthai hei tynjooh wei wiarnar wiarluti.
Hawa kut lada man bait kamni,
Yi’w yoh de u ong, haap hun i ki.
Pynkut hei sihbhah kambhah ka juk ka pateiñ,
Bru pyrthai salonsar i jooh u maad kylleiñ.
Sadu iwa eh wa eh, kyntien ki waheh.
