Palat 400 ngut ki bru da sahkut ki ha ka rel Monrail ka Mumbai hadien wa sangeh ko hapyrdi ki ar tylli ki Station neidaw wa thut ka bordiñ hadien wa joor u slap ynne ka sngi ha Mumbai heiwa kini ki bru wa em hapoh da sahkut ki palat ar kynta.
Kani ka Monorail da sdang ko wow thut heipor 6:15 i janmiet hapyrdi ka Mysore Colony wa Bhakti Park Station wei da wan ki Fire Brigade kiwa da pynemkaam da ki Crane yow sai ya ki bru wa em hapoh.
I daw wa khynnia bru toh wa boon wa pynemkaam ya kani ka Monorail neidaw wa chlai um iwa da pynthut leh yei bordiñ wei katkam wa pyntip u Deputy Chief Minister ka Maharashtra, u Eknath Shinde da ye wow sai ya kiwa boon kiwa em hapoh.
Kiwa lai luti da ong ki wa kani ka Monorail slem haroh ko wow poi ha Station hadooh chiteiñ kynta kamtæ da em boon ki bru wa yang kamwa 500 ngut haroh kiwa da psiah hapoh kani ka rel.
Discussion about this post