Shillong: I yaklam pynbait ya u pood u ang hapyrdi ki ar ngut ki Montri Rangbah yong ka jylla Assam wa Meghalaya hadooh ynne dang sahteiñ i, wei hawa kylli hajrong ini na u Prestone Tynsong uwa man kam u Symbood Montri Rangbah ka jylla, da pyntip u wa u Montri Rangbah ka Meghalaya, u Conrad K Sangma da paan por u wow yachem wa u Montri Rangbah ka jylla Assam, u Sarbananda Sonowal, tangwa da wan noh ka khlam COVID-19 kawa da pynsahkut ya ini i thmu.
U Tynsong da ong u wa kamwa man kattæ, ki jylla wa ka ri waroh kawi da boonkaam ki hei wow yakhun ya ka khlam kawa da pynman ya kiwi ki kaam wow sahteiñ noh, tangwa da ong won u wa neiliang u Conrad da phah u da ka chithi cha u Sonowal wow yaklam hawa yatoh wa ka khappood.
