Hadien wa ini wadep hei kynreh ya ki kot ki sla dapoi chei em kiwa chah dat kiwa kreh mylla ha ka Resort wa dang chna ka Centre Point Group ha Laitkynsew, East Khasi Hills, da jia leh kamjooh ha ka thaw pynkreh ya ka Umiam-Umtru Stage III Power Station wa em ha Ri-Bhoi District hadooh wa da sangeh i kreh kattu la chi tayaaw haroh.
Heini leh da em kawi ka seiñ kawa da wan yow pait ya ki kot ki sla kam ka Labour License heiwa da pynbaad wa ha ini wa jia da chah dat kiwa na baar jylla deilang kiwa napoh ka jylla kiwa kreh ha kani ka thaw.
Neiliang ki ar tylli ki dorbar chnong wa kynthup ya ka Dorbar Chnong Nongdiengngan wa ka Dorbar Chnong Nongmahir da ong ki wa man iwa sñiawkhia wa hap pynsangeh yei kreh kani ka Power Station.
Ka khubor wa da yoh da ong wa ki dkhot kani ka seiñ da wan ki deiwa khlem klam katkam wa toh ka luti tangwa da dat pathan ki ya kiwa kreh kiwa na baar jylla wot ya ki Khasi leh kiwa kreh mylla hadooh wa hap u khang yei pynkreh ya kani ka Stage-III.
Ki bor chnong da ong ki wa deiwa pynsangeh yei kreh da dooh nong wot ki tre jylla kiwa kreh ha kani ka thaw wei ka Company wa pynkreh leh da yut ko na kani ka thaw heiwa da dooh tulop lut waroh neidaw wa tieñ yeini wa jia.
Da kyntu ki ya ki seiñbhalang wa hawa wan lai kynreh ki ya ki kot ki sla wow tipmit ki cha ki bor chnong neibhah kamwa man kattæ da chah ktah lut waroh ym du ya ki Khasi kamjooh i kreh ya kani ka kaam yow pyndap bordiñ ya ka jylla. Da pynche ki leh wym kyrchaan ki yei em ki baar jylla kiwa wan kreh khlem da biang ki kot ki sla.
Da kyrpaad ki leh ya ka sorkar wa ka MeECL wow tuklar ki khnang yow chngaaiñ kiwa kreh wei yow sdang biang i kreh.
Discussion about this post