Ka Federation of Khasi Jaiñtia & Garo People (FKJGP) War Jaiñtia Circle ynnin ka sngi da e dorkhat ko ha u Executive Engineer PWD (Roads) Jowai South Division wow kyrpaad joor ya oo wow pynkreh noh ya ar tylli ki sarok kiwa em hapoh thaaiñ War Jaiñtia, Amlarem Sub-Division.
Kini ki ar tylli ki sarok kiwa ka seiñ angnood ko wow pyndep noh toh na Kudengrim hadooh Kudengthymmai heiwa da sangeh i kreh kamjooh u sarok Amlarem hadooh Nongbareh uwa da emkaam wow chna pynheh noh ya oo katkam wa dawa i por.
Kamwa man katni kiwa chong chnong kiwa im ha kani ka thaaiñ lyngba kini ki ar tylli ki sarok da chem chitom ki khamtam ha i lai i wan neidaw wa da sih ware u sarok wei kiwa boon toh ki warep kamtæ da man iwa eh wow pynpoi ya ki mar yong ki cha ki yaaw ki haat.
Heiyatoh wa u sarok Kudengrim hadooh Kudengthymmai ka seiñ da ujor ko ha u EE heiwa kamwa man katni i kreh ya u sarok da sangeh noh i da u Contractor, u Khlur Pakma, ya uwa ka sorkar dadep mang (Sanction) ko hadooh Rs. 17.6 klur tam wow pynkreh, katkam i tip ka seiñ da sdang pynkreh ya oo na ka 6 Naiynru 2022 da i thmu wow pyndep ha u Naiynru 2025.
Heiyatoh wa u sarok Amlarem hadooh Nongbareh, ka FKJGP War Jaiñtia Circle da kyntu ko ya u EE wa toh u pynchna noh ya u sarok uwa jrong kamwa 21 Km wei uni u sarok man u u budloom i roi i paar ka thaaiñ War West Shilliang Amkshar.
Ka seiñ hawa lai pait ha ka 3 tarik uni u bnai da chem sakhiat wa kini ki sarok ym chynna de yei psiang lait na ki thlu wa ki moo.
Chooh chooh da pynsñiaw leh wa lyngba uni u sarok da em da ki spah tylli ki kari ha ka chi sngi kiwa lai wa wan wei kamwa man katni da emkaam wow pynheh noh ya uni u sarok khnang wow lait nei khynñia.
Neiliang u President ka seiñ, u Shlur Mukhim da ong u wa hadien i yachem wa u EE ka seiñ da yoh ko i pynche heiyatoh wa u sarok Kudengrim hadooh Kudengthymmai, wa neipor cheipor neiliang u EE boonsien da pynkynmoo u ya u Contractor tangwa ym mano de u wow kreh yei kaam. Kamtæ ka seiñ da kular ko wow booddien wa u Contractor heiyatoh wa ini.
Hajrong won i sih u sarok na Amlarem hadooh Nongbareh, u Shlur Mukhim da ong u wa ya uni u sarok da ieh donhi khlem chna pynmiat wei da kyntu ya u MLA ka thaaiñ, u Lahkmen Rumbui wow yarap lang u wow pynchna ya u sarok neibhah na kani ka thaaiñ da mih chiboon bha ki bru wa pawnaam wei da toh i por wow em noh ya u sarok wa biang neibhah uni u sarok da pynyabi u nadooh ka chnong Amlarem, Amshipai, Shia Hyiang, Pamtadong, Ammutong Padu Mawsku, Padu Bah, Padu Mawjyllang, Mawngap, Khonglah Nongbareh Rim, Nongbareh Lyntiar, Kudeng wa ka chnong Amkoi.
Discussion about this post