Ka Meghalaya da ye ko wow yaleh pyrchah ya ka Kerala yow pynkut ya ka yalehke da 2-2 haka Senior Men’s National Football Championship ka Santosh Trophy ha Manjeri Payyanad Football Stadium, Kerala ynne ka sngi heiwa da dap ka madan da kiwa kyrchaan ka Kerala.
U M Muhammed Safnad da thap nyngkong u ya ka Kerala ha ka minit wa 17 wei da pynbood sa kawi ka kool tangwa ym em kheiñ ya ka neidaw wa Offfisde uwa yalehke ka Kerala.
Ha ka minit wa 40, u Atlanson Kharmaw da e bol u cha u Kynsaibor Lhuid uwa da dat dei khlieh yow thap ya ka kool ka Meghalaya.
Ha ka kylla miet, u Figo Syndai da thap u ya ka kool wa ar ka Meghalaya ha ka minit wa 55 tangwa ka Kerala da su kylla ko ha ka minit wa 58 lyngba u Muhammed Saheef.
Uwa yang kool ka Meghalaya, u Frolicson Dkhar da yoh u yei naam Man-of-the-Match wa da ye u pynsangeh ya kawi ka kool ka Kerala yow lait ko u jop.
Ka Meghalaya kattu da yoh ko 4 Point hadien wa jop ko da 3-2 ya ka Rajasthan haka 18 tarik wei daw yachem ki waka West Bengal ha ka 22 tarik heipor 4:00 waje i janmiet.
