Ki yalehke ka Super Division ka Saipung Block Sports Association (SBSA) wa pynman ha chnong Lamyrsiang da pteiñ biang ynne ka sngi hadien wa hap pynpep ya ki yalehke ynnin ka sngi neidaw wa joor u slap.
Ynne ka yalehke hapyrdi ka Mulait United FC pyrchah ya ka Jalaphet Bri Sumer SC man ko kawa yathaiñ bha kawa da yoh u thap kool nyngkong da ka Mulait ha ka minit wa 3 lyngba u Bing Chyrmang tangwa chwa u kut ka kylla step, ka Jalaphet da yoh ko wow pynuiñ chi kool ha ka minit wa 40 lyngba u Stephan Pale.
Ha ka kylla miet won ka Mulait da yoh ko wow pyntam biang lyngba u Raplang Suchen tangwa da su kylliang won da u Stephan Lalthangliana ha ka minit wa 84 yow pynkut ya ka yalehke da 2-2.
Ka yalehke u pteiñ ko ha kani ka 8 tarik hapyrdi ka Mochut Pyrdung SC pyrchah ya ka Tluh SC wei daw pynbood won saka Latyrke SC waka United Biate.
