Kam chibynta ka World Rabies Day næ i yakhun wow yada na i kjut Rabies kawa man kawi na ki jait kjut wa maa bha kawa poi chei yap ki bru lada chah dait chah prat ha ki mrad wa em ya kani ka kjut, ynne ka sngi neiliang ka chnat yong i chait i khiah ka West Jaiñtia Hills District chirup i yakrehlang ki bor District ka West Jaiñtia Hills, ka chnat Veterinary West Jaiñtia wa ka Just Be Friendly (JBF) Trust Mission Rabies da pynman ki yei pynsñiawthooh paidbah hajrong kani ka jait kjut wei da sdang ki leh yei lai kem ya ki ksaw sarok ha ki thaw waphær waphær ka chnong Jowai neibynta u e Injection ya ki kam ka laad u yada nei kjut Rabies.
Wei ini i lai kem ksaw sarok ha Jowai neibynta u e Injection u neh ko le sngi lynter itæ hadooh ka 30 tarik uni u bnai.
Ha ka yalang wa pynlai da ka Dr. P. Shylla, District Medical and Health Officer, West Jaintia Hills, ha Conference Hall ka DMHO, chwa wow sdang i lai e Injection ynne ka sngi, neiliang u Dr. Bahiam Kupar C Nongrum, District Surveillance Officer (IDSP) & District Nodal Officer, NRCP, ong u wa yei kjut rabies ye u yada du lada sumaar yei chait i khiah yong ki mrad wa i chait i khiah ki bru.
Da pynsñiaw haroh u hajrong i emkaam u e Injection ya ki ksaw khamtam wow em i kitkhlieh na ki tre wa ri, deiwa ong leh wa lada 70% na ki ksaw wa em ha kawon kawon ka thaw ye u e Injection, daw yarap ko chiboon ya ki bru u lait ki na kani ka kjut Rabies.
U Dr. Nongrum da kyntu haroh u ya ki paidbah wa lada chah dait næ chah phrat ha ki mrad wa ri ha yung næ kiwa cha sarok toh u sait dei sabon wei theh da ka um wa kai kamwa 15 minit najrong wow chimkhia u lai booh wut wut cha ki thaw sumaar wa jan tam, heijooh i por u pyndep leh yei lai e Injection katkam i por wa da booh u pyndep.
Ka Dr. R. Bamon na ka chnat Veterinary hawa klam da pynsñiaw ko yei kaamram yong ki heiyatoh wow e chakri ya ki mrad ha kylleiñ ka District, wei da pyntip haroh ko wa em hi ka Veterinary Hospital kamjooh 15 tylli ki Veterinary Dispensary ha ka District kiwa pait ya ki ksaw, ki miaw kamjooh kiwi won ki jait mrad waphær waphær.
Khana haroh ko wa jooh pynman ki yei e Injection neibynta ki mrad heiwa ha u snem 2025-2026 kamwa 2500 tylli ki mrad da ye ki wow e Injection.
Heijooh i por kyntu ko ya ki paidbah khamtam ki tre wa ri ya ki jait mrad waphær waphær wa kiwa ri ksaw ri miaw wow sñiawbha ki u yakrehlang wa ka chnat Veterinary dei wow lai e Injection man-i-por ya ki jait mrad ri cha ka chnat Veterinary.
Neitæ u pyntip leh smat smat cha ki bor wa toh u pait lada em i suba yoh kjut Rabies neiwa chah dait ha ki ksaw sarok khnang wow leh smat yei kaam yow yada nadooh i mynsien bru wa ki mrad kamjooh.
Neiliang u Dr. Shishankar, JBF Trust, (Mission Rabies) da ban joor u hajrong i emkaam u pynkhlan i yakrehlang hapyrdi ka chnat yong i chait i khiah wa ka chnat Veterinary kamjooh ki bor District, ki bor chnong, ki seiñ wa ka imlang sahlang khnang yow ye u yada wei pyndooh pyndam ya kani ka kjut Rabies.
Da pynrap haroh u hajrong i emkaam wow pynsñiawthooh paidbah wa i ya chimbynta deilang ha ka imlang sahlang yow pynkhlan ki laad e yada wei pyndooh syndon ya kani ka kjut hapoh ka West Jaiñtia Hills.
Discussion about this post