15 49.0138 8.38624 1 0 4000 1 https://wyrta.com 300 0
Advertisement ad1
Advertisement ad1

Sdang i ku pynehrngu ha u Loom Sapetbneiñ

1 Comment
Advertisement ad1

I ku pynehrngu wa chisien chisnem ha u Loom Sapetbneiñ da sdang i ha ka 26 Duyatra da i ngooh i dem i sut i choor wa ka kñia ha Iaw Nongthroh hapyrdi u Loom Sapetbneiñ. 

Ya ini i lehniam da pyndep chwa wow sdang i ku loom ki paidbah cha khlieh uni u loom ha ka 2 Thohlakhmi. 

Ha ka lehniam wa da pynlai da ki waheh rangbah wa kynthup ya u Skor Jala, u Khnong Rynsan na ki waheh wasian ka Seng Khasi Mawkhar Shillong heiwa da ngooh da dem wow pynehrngu wa ha ka 2 tarik yow lait na i wit i kah heiwa u Skor Jala ha ryngkat ki para wa kñia da pyndep ki ya ka niam ka rukom katkam ki riti dustur ka Raij Mawbuh.

Hadien i lehniam ha Iaw Nongthroh, da pynemwarom ya ka bri rymaw heiwa da em ka kñia wow pait ya ki dak ki chin da ki waheh wasian wow yoh yei kyrkhu kyrdoh neibynta i lai ku pynehrngu paidbah ha ka 2 tarik. 

Manda biang lut liang wanang waroh kiwa embynta ha ka lehniam da pynsum ki ya u Maw Mei Mawbuh wa da yahkhmat da ki waheh wasian wa kynthup ya u Syiem Hima Mylliem, Ainam Sing Syiem wa kiwi kiwi.

Mar ya dep ka niam ha Raij Mawbuh, ki waheh wasian da ku ki cha khlieh u loom neibynta na ka lehniam kawa da kut, hawa thmat ya ka pylleiñ deiwa ngooh wa dem ha u khoo wa tip leh kam u ‘Khaweh Khawkdang’ chwa wow saam paidbah. 

Nadooh wa sdang i ku pynehrngu ha u snem 2000, ya u khoo da jooh e da ka Syiemsad Hima Mawbuh ryngkat i kyrkhu kyrdoh wa da naam ha ka dorbar ki heh ka Raij na ka kur Rangslang, Shylla, Manar wa Shadap. 

Katkam kani ka pait dak pait chin da paw wa ki blai ki ryngkaw em ki ryngkat wow synraan ya ki paidbah ki wow wan poi ha kani ka sngi da i suk i saiñ.  

Ini i ku Loom Sapetbneiñ man i leh ka bynta yong ka Dorbar Raij Mawbuh ha ka Hima Mylliem ryngkat ka Seng Khasi Kmie wa da kitkhlieh wow pynlai da ka Lyngwiar Korbarkam namo ka Lum Sohpetbneng Committee. 

Hadien ki phaw snem wa ka Raij Mawbuh wym ye de ko u pteiñ ya ka niam kamtæ da chimkti noh da ka Seng Khasi Kmie katkam wa da maitphang ka Seng Khasi Mawlai hadien wa chimkhia da uwi na ki waheh ka Seng Khasi, u H O Mawrie (Baam kwai ha dwar u Blai). 

Da ong wa heipor wa synchaar u Syiem Sati Raja, dang em u khla ha khloo wa yoo paidbah wa jooh synraan u kam u ryngkaw wasa heipor wa man ka niam ka rukom ka Raij Mawbuh. 

Kamtæ nadooh u snem 2000 da phooh da phieñ i ku Loom Sapetbneiñ wa yahluti da u Sumar Sing Sawian wa u Dipshon Nongbri uwa man leh u Khnong Rynsan wa katni. 

Kam wow pynkynmoo wa ka Law Nongthroh ha pyrdi u Loom Sapetbneiñ toh kawa da tip da ki stat tip ki bru pyrthai wa da seiñ chnong seiñ thaw kamwa da yahkhmat da u Dr. Marco Mitri heiwa da chem wa em ynñiaw tylli ki mutha kur, ki moopynyieñ wa kiwi kiwi ki jait moo wa da pynemkaam da ki warim wajah. Heitæ em ka sakhi katkam ki stat tip wa katni wow pynskem ya ka yutang u Sapetbneiñ heiwa da ngait wa ki Ynñiawtrep wan hiar ki na bneiñ na ka tangnoob tangjri lyngba ka yingkieñ ksiar Loom Sapetbneiñ.

Advertisement ad1

1 Comment

  • February 2, 2020 at 4:58 am
    Barris M

    Unlike in Jaiñtia Hills, that simplicity is so cool, no one is wearing a brand new suit or put on a neck tie.. 👽

    Reply

Leave a Reply