Jowai : Ka Ladthadlaboh Dorbar Chnong ynne ka sngi da sdang ko ya ka leh kmen Platinum Jubilee namo i dap 75 snem heiwa da wan wai ya ka da u Paul Lyngdoh, MLA kam u kongsan.
U Paul Lyngdoh da yaroh ya ka Ladthadlaboh wa poi ko cha uni u moo-mær wei da pynkynmoo u ya waroh ka spah ka chnong ka thaw toh ki bru wa em ha ka kiwa ya tylli kiwa krehkaam lang kiwa tipmit uwi ya uwi.
Da e nongmuna u wa ha uni u snem da yoh u sakhi ya ka leh kmen pdiang snem thymme ha Jowai wei ong u i rukom mih paidbah pynyoo wa ka imlang sahlang dang khlan ko ym toh kam cha ka sor Shillong wa da jan wiar ini waroh wei cha kiwi ki sorbah da wiar i hadooh wa ym ya tipmit para jan yung jan sem.
Da ong u leh wa ha ka pyrthai wa katni waroh ki chnong ki dong da haap yaleh pyrchah sa iwi i kjut wa da roi bha itæ toh i dih drugs kamtæ ka chnong haap yakrehlang ko yow ye u pynwiar ya ini i kjut.
Ha kani ka sngi da khana ya ka parom ka Ladthadlaboh da u waheh chnong u L.D. Lakiang. Da ong u wa ha u snem 1942 ya kani ka chnong da sdang da ki 11 tylli ki manyung hei yah khmat 12 ngut ki chynrang wa 9 ngut ki kynthai wa 8 ngut ki khynnah khynroo.
Da leh warom leh ya kani ka sngi deiwa saam ya ki memento cha kiwa ha yung ha sem kiwa seiñ ya ka chnong kamjooh kiwa kreh ya ka chnong.
Discussion about this post