theme-sticky-logo-alt
theme-logo-alt
Advertisement ad1

Sdang i lehkmen dap 100 snem i wan ka Salesian of Don Bosco ha Shillong

U Archbishop ka jylla niambah yong ka Balang Katholik Shillong, u Archbishop Victor Lyngdoh, ynne ka 13 tarik da wai pyrda u yei lehkmen dap 100 snem yong i wan yoohkjat ka seiñ ki bru niam ka wa tip kam ka Salesian of Don Bosco deiwa pynhær ya ka lama yong kani ka seiñ ki bru niam ha Don Bosco Technical School, Laitumkhrah, Shillong. Ya kani ka lehkmen dap 100 snem daw pynkut ha u Niachiphaw 2022.

Ha ka 12-01-1922 ki bru niam ka Salesian of Don Bosco, da wan ki kam ka dhab Missionary yong ka thaaiñ mihsngi ha Guwahati wei ha ka sngi wa bood, itæ ka 13 tarik da yoh ki wow wan yoohkjat won ha Shillong. Ya kini da yahkhmat da da u Father Louis Mathias, uwa da man won kam u Bishop wa nyngkong yong ka Shillong ha u snem 1934.

Ha ini i lehkmen dap 100 snem da sdang dei pynhær lama hakhmat yong u mot u Don Bosco, i rwai yong ka seiñ wa i pynemburom ya ka Maria wei da pynbood won da i lai lang cha ka yungmane.

Da yoh leh yei kñia i khriam Mass Wakhooid wa da pynbynta da u Archbishop Victor Lyngdoh ryngkat wa u Fr. Paul O Lyngkot, u Provincial, u Fr. John Zosiama, u Vice Provincial, u Fr. Richard Majaw u VG ka Shillong Archdiocese, u Fr. Pascal Lyngdoh u Parish Priest ka yungmanebah, ki Lyngdoh wa ki bru niam Salesian.

Hawa saam ya ka ktien yong u Blai, u Archbishop Lyngdoh da pynsñiaw u yei sñiawngooh ya u Blai ya i wan yong ka Salesian ha Shillong. U Archbishop Lyngdoh da ong u man i kyrkhu wa khroo ya ka Balang, kawa da kreh wow yalap wow pynpoor ya ka khubor wabha wei wow heh u san i thoh i puræ wa i nang i stat.

Chwa ini, u dkhot yong ka seiñ Salesian, u Father A.L. Jose, uwa man u Co-ordinator yong ka Centenary Celebration, da khana u ya i parom wa tbian yong ka seiñ. Da pyntip u wa ki 11 ngut ki Missionary yong ka seiñ Salesian na Italy, France, Spain wa San Marino hapoh i yahkhmat yong u Father Louis Mathias toh kiwa da wan yoohkjat ha Shillong ha ka 13 tarik u Duyatra (Jan), 1922.

Share this:
Previous

I sñiawngooh na kiwa ha yung ha sem u (L) Sunday Morning Pariat

Next

Daw pynman ya ka Dorbar ka Kur Phawa Siangshai