Jowai : Ka dong Lumpariat ynne ka 7 tarik da sdang ko ya ka lehkmen dap 25 snem namo ka Silver Jubilee Celebration kawa da wan wai da u C. Ymbon, MLA kam u kongsan hei emlang u M. Mulieh, MDC kam u symbood kongsan.
Katkam i parom tbian wa da yoh na u J. Khonglah da ong u wa heipor wa sdang nyngkong ya ka dong ha u snem 1992 da em da 10-11 tylli ki yung wei ha u snem 2001 da thied ya i thaw wow chna ya ka Community Hall na ka M. Shylla heidor T. 1 Lak katwa yei bai chna ya ka da poi ko 10 Lak heiwa kamwa 8 Lak da yoh na ki MLA Scheme wei kawa tam won da esñiawbha para tre dong.
Ka kong Kong Trelis Ryngkhlem, President Seiñ Manbei da khana ko wa ki daw wa seiñ ya kani ka seiñ kynthai toh neidaw wa emkaam u yarap ya ki para dong khamtam heipor yap bru neibhah na chwa haap sai na yung ya ki kchu, ki pliang, ki tyngkrong wa kiwi kiwi yow pyndap tiar ya kiwa ha yung kiwa khlaad.
Kamtæ ka seiñ da ye ko u pyllang poisa yow thied ya ki tiar ki tiar wow yarap ya ki para dong heipor wa emkaam ki.
Ka kong Lamin leh ong ko wa ki manbei jooh pynman ki nachwa ya ka yang miet neibhah ha ki tu ki por boon ki chynrang wa chong dih cha sarok da em leh kiwa thiah cha sarok hadooh cha ki yung wa dang chna thymme.
Dei bor wa kreh chitom ki manbei da ye ki pynkhooid ya ini waroh.
U M. Mulieh hei klam yong oo da kynmoo u wa heipor dang khian u wa kani ka thaw heipor wa jooh lai sum ki cha loom wei katni da kylla dur kam ka wi na ki dong wa da lai bha cha khmat.
U kongsan u C. Ymbon won da ong u wa yoosuk u yoo wa ka dong man ko kawa khooid wa jngiar wei lada wyrchaw wa i rta u bru 25 snem toh i iwa da ih bha i rta kamtæ da kyntu u ya waroh u man ki kiwa ya tylli hapoh ka dong yow yoh ko u yoo sa boontylli ki snem.
Neiliang ki manbei, ki khynroo khyllood ka dong da e ki ya ki rwai, ki chaad wa ha rukom.
Ha kani ka sngi leh da ah ya u Silver Jubilee Cake da u Waheh Chnong ka Ladthadlaboh u L.D. Lakiang.
Ya ka yalang da pyllai da u J.K. Rymbai, Waheh Chnong, Lumpariat.
Discussion about this post