Ka Jowai Co-Operative Urban Bank Ltd. da sdang ko yei lehkmen dap 50 snem ha ka yalang wa da pynman ha ka 12 tarik ha yung krehkaam wa thymme ka Bank wa em ha K.N.B. Road, Iawmusiang.
Ya kani ka Bank da sdang ha ka 26 tarik u February 1976 deiwa em ki kattu katni ngut ki khroo pyrkhat hapoh i yahkhmat u (L) J.D. Pohrmen uwa man ha itu i por kam u CEM ka Jaintia Hills Autonomous District Council wei da man u leh kam u Chairman wa nyngkong kani ka Bank.
Neiliang u In-Charge CEO, u A.H. Lytan da ong u wa kani ka sngi da man ko kawa dap dei sarong, i kmen wei sñiawngooh deiwa kynmoo tympang ya ki sngi wa sdang heiwa ym ye wow mutdur wa i chlur wei chynna jngai wow poi chadooh uni u moomær deiwa sdang neiwa khian wei suki suki lai uwi u snem hadien uwi deiwa kreh chitom dei mynsien krehlang yow chakri hok ya ka imlang sahlang.
Da e khublei u leh ya waroh kiwa pynemkaam ya kani ka Bank namo ki Customer wa e ki yei chaniah wei da em ki rynkgat chiruplang wow e yei kyrchaan heini i lai luti ka Bank.
U kongsan ha kani ka sngi, u K. Khonjoh, ARCS, West Jaiñtia Hills District hawa e yei klam da pyrkhat u hadooh katwon chem chitom kitu kiwa sdang ya kani ka Bank deiwa kyntu ya kiwa kreh ka Bank katni wow bood ya ki yurim wa da booh da kiwa seiñ deiwa pynneh pynsah yei burom kani ka Bank.
Ha kani ka sngi da yoh leh yei rwai pdiang sñiawbha da kiwa kreh ka Bank wa i klam leh na u L. Paswet, Vice Chairman ka Bank wa ki kyntien e khublei na u R.L. Syngkon, Secretary Organizing Committee.
Discussion about this post