Kam chibynta wow pynkrehkaam ya ka aiñ Meghalaya Residents Safety & Security (MRSSA) Act, 2016 kawa man ka aiñ wow chim pyrtuid ya kiwa chongwai yow ye u yada na kiwa leh ya ki kaam wa pyrchah ya ka imlang sahlang yow em i suk i saaiñ, wei yow ye u leh yeini da thung leh da ka District Task Force yow pait yei pynkrehkaam ya kiwi kiwa boon ki aiñ kiwa yatoh wa kani ka aiñ.
Katkam kani ka aiñ, waroh kiwa chongwai ka Meghalaya hap ki wow pynbiang ki kot ki sla ha ki Police Station deilang cha ki bor ka chnong wei yei pyrtuid kini won hap pyntip man ka le bnai cha ka District Task Force.
Yow pynsuk yeini, da sdang leh ya ka website www.megrssa.nic.in wa ye u pynemkaam da kiwa chongwai, ki tre yung, ki dong ki chnong, ki Police Station wa ki District Task Force yow thap pyrtuid.
Kam wow pyrchang u leh yeini i Registration, da pyrchang nyngkong ha ki 16 tylli ki dong wa em ha Shillong wa kynthup ya ka Nongrim Hills, Pohkseh, Nongrah, Nongmensong, Lapalang, Riat Laban, Wahdienglieng, Lawsohtun, Umpling, Mawpat, Riat Laban Kynjat Phutbol, Madan Laban, Malki, Lower Lumparing, Upper Lumparing wa Mission Compound.
Ya kiwa chongwai hap ki wow khana chaphang yong ki ha ka Non-Judicial Stamp Paper ka Form A kawa chongdor Rs. 10 deiwa kdaw leh ya ar ngut ki bru wa tipmit ki najrong wa pynbiang ki ID kam ka EPIC, Ration Card, Passport, Driving License katwa ya kiwa lai puræ hap ki wow wanrah ya ka Student Photo ID deilang ka Certificate na ka thaw puræ ki deilang wa i dur wei ini man ko ya kiwa da chongwai katni kamjooh kiwa wan chongwai hei sien wa nyngkong.
Kitu kiwa da chongwai chwa katni tangwa kwah ki wow kyrriah thaw, daw hap ki wow yoh ya ka Residential Certificate na i dong næ chnong wa sah ki deiwa pynbiang biang ya ki kot ki sla wa da kdaw haneiñ.
Discussion about this post