Ka Jowai Municipal Board chirup i yakrehlang wa ka Meghalaya Bharat Scouts & Guides, West Jaiñtia Hills hajrong ka thong wow wanrah yei khooid i pliah wei chait i khiah yong ka chnong Jowai kamjooh hei man i long ki soodong sookun ka rymaw, ynne ka sngi da sdang ki u pynman ya ka Awareness Program ha man ki skur wa em ha chnong Jowai.
Ha kani ka sngi ya kani ka pynsñiawthooh paidbah da pynman ha ki le tylli ki skur wa kynthup ya ka Jowai Govt. Boys Higher Secondary School, ka Govt. Girls Higher Secondary School wa ka Marian Hill Higher Secondary School.
Ki dkhot ka Meghalaya Bharat Scouts & Guides kiwa da ya embynta ha kani ka sngi hei wow li e yei klam i batai, pynche pynsñiawthooh ya ki khynnah skur toh u Ohiwot Laloo, District Secretary, MBS&G-WJHD, u Rising Kharngi (Scouts Master), u Stopper Phira (Scout Master), ka C.D. Laloo (Guide Captain), u Pet Dhar (Scouts Master), ka Lamisakani Dkhar (Guide Captain), u Julius Pakem, (Scouts Master), Teilangki Rymbai (Scout Master) wa ka Aidasuk Warlarpih (Guide Captain).
Ha ka thong yong kani ka yalang, neiliang ki bru wa stat bru chemphang ka Meghalaya Bharat Scouts & Guides da kyrsu kyntu joor ki ya ki khynnah wow em ki i kitkhlieh wei kitkhia neibynta i khooid i jngiar dei wow sdang na idæ samen wei wow man leh ka nongmuna wa bha ya kiwi.
Chooh chooh da pynsñiawthooh leh ya ki khynnah chaphang kammon i rukom pynlang næ u noh yei jhep ki jakhlia næ ki tiar ki tar wa mih na ki yung ki sem deiwa pynemkaam ya ka Blue Bin wa ka Green Bin kiwa ka Jowai Municipal Board da e ko cha ki manyung neibynta wow pynsuk yei rukom pynlang yei jhep ki jakhlia da ki bru ka Municipal Board manda toh ka sngi wow wan chim ki ha man ki dong ki chnat.
