I tympdung tympra ya ki karkhana Coke wa krehkaam pyrchah ya ka aiñ da sdang i ynne ka sngi ha East Jaiñtia Hills District heiwa da chah tympdung nyngkong ka Halari Coke Factory kawa em ha Umkhe ha ki thaaiñ Sutnga.
U DC ka East Jaiñtia Hills, u Abhilash Baranwal da pyntip u wa ynne da sdang yei tympdung tympra ya kini ki karkhana Coke hapoh ka District wei waroh kiwa daw tympdung tympra hapoh ka District toh 34 tylli.
Kam wow pynkynmoo wa hapoh ka Meghalaya High Court da bichaar ya boon tylli ki PIL kiwa da yaleh hajrong ini wei na East Jaiñtia Hills neiliang ka Environment Coordination Committee ka Sutnga Elaka da lai rah ko ya ini i kaam cha ka NGT kawa da phah khang ya waroh ki karkhana Coke kiwa krehkaam khlem da yoh bor wei kitu kiwa da yoh bor leh hap ki wow bood katkam ki kyndon.
Ka Meghalaya High Court da sñiawkhia ko yei em kini ki karkhana Coke neidaw wa pynchlur ki wow tih mooyong pyrchah ya ka aiñ heiwa da chem ko yeini khamtam ha West Khasi Hills wym ye u pyntikna u mooyong toh uwa wan neiwon wei boon i por toh uwa tih pyrchah ya ka aiñ.
Ka High Court na ki por cha ki por da pynsñiaw ko yei chrai wym ye ka sorkar u khang ya kini ki karkhana kamjooh leh da maham wow phah takit ha ka CBI yow pynchitom ya ki bor District, ki bor pulit ki wym ye wow khang ya ini i kaam hadooh wa da suba ka yung bichaar wa emktilang ki ha ini i kaam.
Hajrong ini waroh, ka sorkar ynnin da pyntip ko wa daw lai tympdung lai tympra ko ya waroh kini ki karkhana Coke wa da pynyieñ da pynkrehkaam pyrchah ya ka aiñ hapoh ka jylla iwa daw pyndep u leh hapoh ka 20 tarik uni u bnai.
Discussion about this post