Ynne ka sngi, kiwa kamai kari Tourist kiwa em hapoh ka satri yong ka All Khasi Meghalaya Tourist Taxi Association (AKMTTA) da sdang ki yei yakhih khlem booh por dei wym chah ya ki kari Tourist kiwa na baar ka jylla kam na Assam wow kit ya ki bru cha ki thaw uiñke suwari.
Ki dkhot ka AKMTTA da pynsangeh ki ya ki kari kam ha Umtyngngar, Kyrdemkhla wa kiwi kiwi ki thaw deiwa pynyang da ki kari Tourist wa em ya u Number Meghalaya yow pynkit ya kiwa uiñke suwari.
Nyngkong da ksoh ya ki kari wei ym e laad tangwa hadien da wan tuklar noh da u Magistrate, da chah won ya ki kari Tourist wow lai cha ki thaw uiñke suwari, hadien ini neiliang ka seiñ da saam noh ko da ki kot lakdop wa batai yei thmu yong ki.
Ha Kyrdemkhla da wan leh u Pynhun Syiem, SDPO ka Sohra yow tuklar hajrong i ksoh ya kini ki kari deiwa kylli na kiwa yahkhmat ka AKMTTA wa kynthup ya u Regaldinus Dohling uwa man u President neiwon yoh bor ki wow ksoh ya kini ki kari Tourist.
Hawa yaklam, neiliang kiwa yahkhmat ka AKMTTA da ong ki wa da ksoh ya ki kari yow pynsñiawthooh cha kiwa yah kari wa kiwa wan uiñke suwari lyngba ki kot lakdop.
Discussion about this post