I yaklam pynbait pood hapyrdi ka Assam wa ka Meghalaya neibynta ki 6 tylli ki thaw wa dang sahnamo ka Phase-II, da sdang ynne ka sngi ha ka yalang wa pynman ha Guwahati deiwa emlang u Montri Rangbah ka Meghalaya, u Conrad Sangma wa u Montri Rangbah ka Assam, u Himanta Biswa Sarma deilang wa ki sahep sorkar kam ki Chief Secretary wa kiwi kiwi de.
U Conrad da khana u wa ki 6 tylli ki thaw wa dang sah toh ka Psiar, Khanduli, Block-I wa Block-II, Bordwar, Mawtawar wa ka Langpih heiwa ynne da chim ya ka rai wa hapoh 15 sngi daw chna noh ya le tylli ki Regional Committee wa em ha ki le tylli ki District ka Meghalaya wa em kini ki kajia pood wei daw khlieh ya kini da ki Montri sorkar kiwa dam mna kam ki Chairperson.
Neidaw wa ka Block-I wa Block-II, Khanduli wa Psiar toh kiwa embynta hapoh ka Karbi Anglong Autonomous Council kamtæ ki leh daw embynta ki ha kini ki Regional Committee.
Hadien wa dep u pynbna ya ki Regional Committee daw sdang yei pynman ya ki yalang paidbah, i ap yeiwa ong ki paidbah wa waroh kiwa emkti wei neiliang ki arngut ki Montri Rangbah leh daw lai hiar ki cha Block-I wa Block-II.
Neiliang u Montri Rangbah ka Assam, u Himanta Biswa Sarma da ong u wa ka Assam toh kawa kwah wow pynbait noh yow pood deiwa pynhunlang ya waroh.
