Sdang ka 10th Pdengshakap Secondary School Football Tournament 2023-24

Ka Dorbar Chnong Pdengshakap da sdang ko yaka lympung yalehbol wa tip kam ka 10th Secondary School Invitation Football Knock-Out Tournament 2023-24.

Kani ka Tournament toh kawa da jooh pynman man-u-snem wei da sdang yaka ha kani ka 30 tarik ha madan Pdengshakap hi, heiwa da wan wai pyrda ya kani ka Football Tournament da u W. Chyrmang kam u kongsan deiwa emlang ki waheh wa sian kani ka thaaiñ, ki dkhot ka Football Committee, ki paidbah wa chong chnong kamjooh wa kiwa chah khut sñiawbha.

U kongsan hei klam yong oo da pyn-eh-nasib u ya kiwa pynman ya kani ka lympung yow man ko kawa lai bait lai ryntih khnang wa i thmu yong ki u man ko kawa jop.

Ka yalehke wa sdang da pynman hapyrdi ka Siangkhnai FC waka Nangbah Mulang SC heiwa ka Nangbah Mulang da jop ko da 3-0 lyngba ki kool wa thap u Elizer Suiam haka minit wa 45 wa 70 wa u Dashngain Sukhlain haka minit wa 48.