Ka West Jaiñtia District Sports Association (WJDSA), Jowai ynne da sdang ko ya ka 3rd Division Football Tournament 2023 kawa tip leh kam ka 3rd U Adelbert Laloo Memorial Trophy kawa da em 46 tylli ki liang na ki chnong ki dong ka District kiwa da wan wow chimbynta.
Kamtæ ynne ka sngi sdang da pynman le tylli ki yalehke wa da sdang da ka Lumsliarsliar pyrchah ya ka Risingsun Lad Mukhla heiwa ka yalehke da kut ko da 1-1.
Ya ka Lumsliarsliar da thap kool da u David Dkhar ha ka minit wa 8 katwa ya ka Risingsun Lad Mukhla da thap da u Yoshar O. Mukhim ha ka minit wa 24.
Ya ka yalehke wa ar da jop da ka Iooksi Youth Welfare yaka Saindur Mihmyntdu da 6-1.
Ya ka Iooksi Youth Welfare da thap kool da u Pyrkhat Paslein ha ka minit wa 3 wa 42, u Pyrshang Tangliang ha ka minit wa 9 wa 27, u Ngaitmi Syngkon ha ka minit wa 70 wa u Sunny Son Sutnga ha ka minit wa 69.
Ya ka Saindur Mihmyntdu da thap da u Chibor Phawa ha ka minit wa 41.
Ha ka yalehke wa le won, ka Moodymmai da jop ko ya ka Mookynphad Mihmyntdu da 1-0 lyngba ka kool wa thap u Same Syngkon ha ka minit wa 61.
Ki yalehke u pteiñ ki ha ka 12 tarik da le tylli biang heiwa ka Khliehshong Ialong daw yachem ko waka Mookaswan Dongneiñ heipor 12:30 pyrdi sngi, ka Myrjai daw yachem ko waka Newhill heipor 2:00 waje wei daw pynkut da ka Salaroh waka Chyrmang Wah heipor 3:30 i sngi.
