Ka Rumshnong Youth Club Bataw da wai paidbah ko ya ka 4th Umsyngki Knockout Football Tournament 2025-26 ha ka 29 tarik uni u bnai ha madan Lai-Phew Krem Playground, Bataw heiwa ki Team wa yaleh ha kani ka sngi wai pyrda toh ka Rymbai Bahkhla FC pyrchah ya ka Lama YSC.
U kongsan ha kani ka sngi toh u Rocky Mylliem Umlong uwa man kam u In-charge yong ka Ladrymbai Police Output ,East Jaiñtia Hills wa u JR Rupsi, dkhot ka East Jaintia Hills District Football Association Khliehriat kam u symbood kongsan.
Neiliang u kongsan da yaroh u ya ka Club wa da chim ko u pynman kam kani ka lympung waheh hapoh ka thaaiñ heiwa da e u leh ka yaroh ya kiwa yahkhmat ka chnong Bataw wa ki paidbah yong ka chnong Bataw wa man ki ki bru wa pait jngai yei bha yei miat wei chongsuk chongsaaiñ.
Ya ka yalang da pynlai da u Ampli Rupsi uwa man leh kam u General Secretary yong ka Club wei da yoh yei klam na u Deihok Sumer kam u President ka Club heijooh i por kam u waheh chnong ka Bataw. Chooh chooh leh da yoh i klam na u Martin Lyngdoh, Assistant waheh chnong Bataw wa na u Seiborlang Rupsi kam u symbood kongsan wa wan heithaw u JR Rupsi.
Hawa kyruiñ cha ka yalehke, da man ko kawa yoosuk bha wei hawa kut ka yalehke da jop da ka Rymbai Bahkhla FC da 2-1 ya ka Lama Youth Sports Club.
Ka yalehke wa bood u pynman ha ka 03-01-26 heiwa ka yalehke u man ko hapyrdi ka Rymbai Pampyrthad SC pyrchah ya ka Sailynter FC heipor 12:30 pyrdi sngi wa ka Pasadawar SC pyrchah ya ka Sevenstar FC heipor 2:30 i sngi.
Discussion about this post