U Minister ka chnat Tourism kamjooh ka chnat Higher Education ka Nagaland, u Temjen Imna Along da beiñ joor u yei chah klambeiñ wei chah dat hadooh wa yap u khynnah na Tripura ha Dehradun, deiwa ong wa ki jylla ka Northeast toh ki wym ye de wow pynkhlaad na ka India.
U Temjen da ong u wa nyngkong toh u pyrkhat chwa wow klam wei ym ye u pynbaad ya waroh wei ki bru wa leh yeini toh kiwa duna hei stat i tip wei ki wym tip iyi iyi chaphang ka Northeast.
Da ong u wa i ki Northeast ymtoh ki ‘Chinese’, næ ‘Momo’.
“U Momo toh i baam wa bang, ki leh toh u maad ki oo, tangwa i rukom man pyrchah ya i toh iwa bakla bha,” da ong u Temjen.
Da ong u wa i sarong i wow man ki nong India wei ka Northeast toh ka bynta ka ri. Ki bru wa leh yeini da chah kem ki, toh u yah ya ki cheini khang wow tip ki kiyi wei kammon man ki bru na Arunachal, Nagaland wa kiwi ki jylla ka thaaiñ.
Ini waroh toh hajrong iwa jia chah dat chah dung uwi u khynnah na Tripura uwa da tip kam u Anjel Chakma wei da yap u ha ka 26 tarik uni u bnai wei u pa u yong oo toh u Tarun Chakma uwa kreh ha Manipur kam u chipai ka Border Security Force (BSF).
Discussion about this post