Ka lympung yalehbol wa tip kam ka 6th Interdong Nongtalang Khlachympa Football Tournament 2023 wa pynman da ka Khlachympa Sports & Cultural Club da sdang ya ka ha ka 2 tarik uni u bnai da ka yalehke hapyrdi ka Nongtalang Mission pyrchah ya ka New Nonglamin.
Ya kani ka Interdong da wan wai pyrda da u MDC ka War Central, u Holando Lamin kam u kongsan wa u MDC ka War West, u Het Pohthmi kam u symbood kongsan deiwa emlang u Officer In-charge ka Jowai Police Station, u Sunday Manar deilang wa ki bru waheh wa bna pyrtuid ka chnong Nongtalang.
I thmu yong katai ka Interdong wa da pynman da ka Khlachympa Sports & Cultural Club man ko kam chibynta wow pynku yei sap i phong ki khynroo kiwa ka-it wow yalehbol.
Ka yalehke wa sdang ya kani ka Interdong da man ko kawa ya jwat bha hapyrdi ka Nongtalang Mission pyrchah yaka New Nonglamin wei da kut ko da 0-0 khlem em way oh u pynkhih jar.
Discussion about this post