Ka chnong Panaliar Jowai, ha ka 25 tarik uni u bnai da sdang ko ya ka Tayaaw Lehkmen yong ka, kam ka dak wow e khublei ya u snem warim ka wow pynkut ha ka 01-01-25 yow pdiang ya u snem thymme.
Ka mat pdeiñ kani ka lehkmen toh kawa ong ‘Ka Sap – Ka Luti Ya Ka Mynried’.
Hachwa u sdang da em ka yalang tbian wa pynlai da ka Leda Sumer, Chairperson, ka seiñ kynthai, heiwa ka Secretary ka seiñ kynthai da e ko ki kyntien e khublei.
Ha kani ka sngi da emlang u Khroobok Passah, Additional Director, Sports & Youth Affairs ka sorkar Meghalaya kam u kongsan uwa wai pynemburom ya kani ka lehkmen heiwa da yoh yei ngoohblai na u Marki Lakadong, President ka Khynroo Khyllood Welfare Organisation ka chnong.
Hei klam u Riquoma Rq. Laloo, Waheh Chnong, da ong u wa kani ka tayaaw lehkmen man ko kawi na ka kabu wow e laad u kyntu yei sap ki khon ka chnong, heiwa u yoh ki u pynyoo jar jiar iwa em ha ki, deiwa kyntu u ya waroh ki khon ka chnong wow yachimbynta nawa sdang hadooh wa kut ka tayaaw.
U kongsan da pynroh u yei pynman ka chnong, deiwa ong wa kiwi jooh pynman ki kam kani toh du kat ki Sport & Game donhi, katwa heini won dayoo ya kiwa boon jait, nadooh kiwa yatoh wa i thoh i taar i puræ puthi wa kiwi.
Da khana u leh wa daw em ka Meghalaya Games ha ka District, deiwa khut u yei ya ksohkti kiwa chong chnong wow em i mynsien pdiang warom ya waroh kiwa wan chapoh ka District yong i. E yaroh u ya ka chnong Panaliar wa man ko, ka chnong wa yatylli ha kiwa boon ki liang deiwa kyntu u ya waroh wow pynneh yeini i mynsien yakrehlang.
Kam ka i sdang, da yoh ya ki khynnah khian wow chimbynta ha ka Kids Fashion Show, da em leh ki Dancing Competition wa kiwi de.
Discussion about this post