Ka e dawai Pulse Polio Immunization kawa le sngi ha West Jaiñtia Hills District da sdang ka ynne ka sngi deiwa pynjoo dawai ka Emelya Ch Momin, Assistant Commissioner, Jowai ya ki khynnah ha ka yalang wa pynman ha Lumkyrwiang Urban Public Health Centre (UPHC), Jowai.
Ka Emelya Ch Momin da ong ko wa i dawai Polio toh yow yada ya ki khynnah wa em hapoh 5 snem nei kjut Poliomyelitis wei da sñiawkmen ko wow tip wa da booh ya ki Polio Booth ha kylleiñ ka District nadooh ha ki chnong ki dong.
Da pyntip ko leh wa kiwa e dawai daw psiah ki ha kawi pa kawi ka yung yow pyntikna wym em uwi næ kawi leh ka khynnah kawa daw dooh u dih dawai.
Da ong ko leh wa hanla ya ka India da kheiñ ya ka kam ka Polio Free, i maa wow mih biang kiwa yoh Polio dang em hi i, kamtæ da kyntu ko ya ki manbei manpa wow ya krehlang ki wa ki Anganwadi, ki ASHAs kamjooh ki Volunteer.
Ka Dr. S. Surong, Pediatrician, MCH, Jowai da ong ko wa i kjut Polio toh iwa ye wow chim yei mynsien bru wei da em leh kiwa poi chei yap chiliang i doh wei ym ye de u sumaar ki.
Da ong ko leh wa kamwa man kattæ ym em dawai wa ye u pynchait yei Polio lait neiwa dih dawai yow yada na ini i kjut.
Da pynche ko leh wa lada ki khynnah da yoh ki wow dih dawai Poloi tangwa dang hap hi wow chim ya ki dawai tika hawa pynman ya sorkar yei e dawai.
Discussion about this post