Kam chibynta wow pynman yei pynsñiawthooh ya ki paidbah khamtam kiwa chong wa sah cha palatsor, neiliang ka yung krehkaam u District Medical and Health Officer (DMHO) ka East Jaiñtia Hills District ha ka 7 tarik uni u bnai da sdang ki wow kynjoh paidbah hajrong ka phang “Every Mother Matters, Every Child Counts”, wei da sdang leh ya ka Human Papillomavirus Vaccination (HPV) Campaign hapoh ka District ha Pamra-Paithlu PHC.
Neiliang u Additional Deputy Commissioner, u A. Nongbri da pynkynmoo u yeiwa emkaam wow em i yada bar yow chah sumaar deiwa ong leh wa i da embhah i wow im hapoh ka ri kawa yarap wow e boon ki laad yarap hadooh dei mynkna kiwa yatoh wa i chait i khiah, ki baam, i pynyoh kreh wa kiwi de.
Wei da pynkynmoo u leh wow baam da ki jait baam wa chait wa khiah khamtam ya ki khynnah wei heiyatoh wa ka tika HPV da kyntu u wym toh u artatien wei wow paan pynche leh na ki Doctor yei wym sñiawthooh ki.
Neiliang ka District Immunization Officer (DIO) ka East Jaiñtia Hills District, ka Dr. N.P. Suchiang da ong ko wa kani ka tika Human Papillomavirus (HPV) toh yow yada ya ki kynthai nei kjut Cervical Cancer wei kani ka kjut toh kawa ye u yada deiwa yoh tika heipor wa biang wei kani ka e dawai tika daw pteiñ ko sa le bnai.
Da pynche ko leh wa ini i dawai man ko neibynta ki kynthai kiwa dadap 14 snem yow yoh yada ki na kani ka Cervical Cancer wei da pynchlur ko leh ya ki wow wan chakhmat.
Discussion about this post