Hadien wa pyndep yei e sikai wa nyngkong neibynta kiwa duna i bor khmat heiwa da man i leh iwa jop wa iwa pynyoh myntoi ya kiwa da chimbynta, kamtæ ka Society for Urban and Rural Empowerment (SURE), ynnin ka sngi da sdang ko sa kawi ka e sikai neibynta ki bru wa duna hei bor khmat.
Na kiwa yoh sikai chwa kawa da pynman ynnin u snem ha chnong Moosakhia kammon wow chna saroo, da em ar ngut kiwa duna hei bor khmat kitæ ka Kongka Sari kawa na Mukhla wa u Krishna Pahawa uwa na Mihmyntdu kiwa da sdang wow chna wei wow dai ya ki saroo.
Ya kani ka e sikai chna saroo wa ar da wai yaka haka yalang wa da pynman ha Dong Lumbhahdakha ka chnong Wahiajer ynnin ka sngi heiwa da wan wow chimbynta 10 ngut kiwa duna hei bor khmat.
Ya kani ka e sikai da kyrchaan poisa da ka yung krehkaam u District Social Welfare Officer, West Jaiñtia Hills wei u man ko neibynta 15 sngi. Wei uwa sikai leh man u uwa duna hei bor khmat uwa tip kam u Kelvin Suting uwa man leh kam u Master Craftsman uwa da yoh leh yaka State Award.
Ya kani ka e sikai wa thymme da wan wow wai da u F.B. Basan, ADC uwa man leh kam u Project Director DRDA, West Jaiñtia Hills uwa da yaroh ya kiwa da wan chakhmat wow chim kabu ya ini wa da e yarap ka sorkar wei da kyrmen u wa kani ka e sikai daw yarap ko ya ki wow ye ki u kamai yow im-ja ki kamjooh yow man ki kiwa ye u yieñ hei kjat yong ki hi.
Discussion about this post