40 ngut ki khynnah khynroo da chah jied ki wow chah sikai ha ka Tour Guide Skill Training wa da pynman da ka Community Institute of Technology (CIT), Amlarem hapoh ka Amlarem Block deiwa ya krehlang waka yung krehkaam yong u Deputy Commissioner, West Jaiñtia Hills lyngba ka PMKKY Scheme.
Ya kane ka e sikai da wan wai ynnin ka 2 tarik ha Sualudong, Thangbuli da u Dr. D. Lyngdoh, Block Development Officer, Amlarem C&RD Block deiwa emlang u Lambormi Suchen uwa, Skill Development Officer (SDO) yong ka Meghalaya State Skill Development Society wei ya ka yalang da pynlai da u L. Lanong, Director, CIT.
U kongsan hawa e yei klam da kyntu u ya kiwa chah sikai wow chimkhia yeini neidaw daw yarap ya ki neibynta wow yoh kreh wei wow kamai deiwa man kam ki Tourist Guide neibhah ini daw wanrah ko yei myntoi ya ki wa ya ka thaaiñ Amlarem leh waroh kawi ha i kaam uiñke suwari neibhah ka thaaiñ War Jaiñtia em ko boon ki thaw kiwa miat.
Da ong u leh wa katni ka sorkar ym ye de ko wow e kaam lut ya ki khynroo khyllood kamtæ ka sorkar da chimkhia wow seiñ khih hi wei wow pynemkaam hok ya iyi wa daw yoh ki na ini i e sikai, wow man leh kiwa em akor, kiwa im ryntih wei wym toh u bichni uwi ya uwi.
Neiliang u Skill Development Officer da khana u wa ini i e sikai ka sorkar toh kammon wow thooh laad ya ki khynroo khyllood wa sah cha palatsor wow kyruiñkhmat ki cha ki kaam uiñke suwari neidaw wa man ko ka jait karkhana kawa e kaam da iwa biang dooh hapoh ka District.
Kani ka e sikai toh kawa 12 sngi wei ha kini ki sngi daw yoh sikai chaphang ka Rappelling, Jumaring, Knot Practice, Rope Stretcher, Basic First Aid, Trekking (Practical and Theory) Guide wa kiwi kiwi.
