Ka Lakadong Ummat Football Team da jop ko ya ka Umlyngsha B FT da 3-1 ha ka sngi sdang yong ka lympung yalehke kawa tip kam ka “Elaka Lakadong Knockout Football Tournament 2021-22” kawa da pynman ynnin ka 15 tarik ha madan bol ka Lakadong Umlatdoh da ka Elaka Lakadong Sports Association (ELSA).
Ya kani ka lympung da pynman ha ka sien wa nyngkong dooh hadien wa da chna ya kani ka Sports Association yong ka Elaka Lakadong kam chibynta wow kyntu kynrong ya i sap yong ki khynroo ha i yalehke Sports.
Ya kani ka lympung yalehke da wan wai ya ka da u Diyo Kyndait kam u kongsan wei u Dr. Sankey Shangpung da man u kam u symbood kongsan uwa man leh u Chairman ka JHADC hei emlang u Siril Suja, na Byndihati, u Bhalang Suchiang, Waheh Chnong Bataw, u Bitral Dkhar (President 5 Chnong) ryngkat u O. Shadong, Dolloi Elaka kamjooh kiwa kitkaam wa ki dkhot ka Elaka.
Ya ka yalang da pynlai da u Firmly Rymbai, President ELSA uwa da pdiang burom ya waroh cha kani ka sngi katwa u N L Talang, General Secretary ELSA da pynsñiaw u yei thmu yong kani Association toh wow kyntu ya i sap ki khynroo hapoh ka Elaka khamtam hadien wa da yoo ha kini ki ar snem wa wan kani ka khlam COVID-19 da khanglaad ko ya ka East Jaiñtia Hills District Football Association wow pynman ya ki League waphær waphær katwa kamtæ da poi i thmu wow pynman ya kani ka lympung.
U kongsan ha kani ka sngi da e u yei klam ya kiwa yalehke wow chim kabu ki hawa yoh kam kani ka laad heiwa ka ELSA da ye ka wow pynman ya kani ka lympung yalehke hawa da kitbok u leh ya ka Sports Association wow ku ko chaphrang.
Ha kani sngi da yoh leh yei chaad na ki khynnah skur yong ka chnong Lakadong Umlatdoh kam chibynta ka dak pdiang sñiawbha ya waroh kiwa wan cha kani yalang.
