Kam chibynta yong i yakhun pyrchah ya ka khlam COVID 19, da sdang pynemkaam leh ya ki jhaad ka Indian Navy na ka Southern Naval Command ha Kochi deiwa sdang ko ya ka OXYGEN EXPRESS wow lai e yarap ya ka Union Territory of Lakshadweep (UTL).
Ynne i step ka jhaad INS Sharda, na Kochi da kit ko ya ki tiar wa ki dawai cha nongbah ka UTL, Kavaratti.
Kini ki tiar wa kit ko toh i dawai wa kynthup ya 35 tylli ki kum Oxygen, Rapid Antigen Detection Test (RADT) kit, Personnel Protective Equipment (PPE), Mask wa kiwi kiwi ki tiar wow yakhun COVID 19. Da yarap leh wow kit ya kini ki mar da ki chipai ha ka INS Dweeprakshak na Kavaratti.
Chooh chooh ka Indian Navy ha Kadmat da phah ko leh uwi u Doctor, ar ngut ki Medical Assistants wa kiwi kiwi.
Chooh chooh ka Southern Naval Command da booh ko 10 tylli ki pyllong wa ka ICU ya ki bru na Lakshadweep ha INHS Sanjivani, Kochi wow yarap pyndap yeiwa duna ha i yakhun ya ka khlam.
Ka Naval Air Station INS Garuda da pynkhreh ko leh ya ka Naval Airfield wow kit ya kiwa chitom.