Ka Seiñ Raij Tuber lyngba kiwa yahkhmat yong ka wa kynthup ya u R. Harvis Phawa, President wa u Jolby Sana, General Secretary ynne ka sngi da pynbna paidbah ki wa ka Behdieñkhlam ha uni u snem u man ko kawa lai bait lai ryntih nadooh ynne ka sngi 16 hadooh 19 tarik uni u bnai hadien wada yoh yei mynjur na ki bor sorkar. Ya kani ka Behdieñkhlam u pynlai bait deiwa bood ryntih yaki kyndon ka sorkar wow yada nei poor yong ka khlam COVID-19 kawa da poor haka jylla, haka ri wa ha ka pyrthai hi waroh kawi.
Ki kyndon wa hap wow bood katkam ka SOP yong ka sorkar man ki kamni hawah:
- Ym chah ya ki paidbah wow ya chimbynta namo u wan paitke ki ha katai ka sngi.
- U chah du 23 ngut ki wasan na kawi kawi ka seiñ chnong wow wan ya chimbynta nadooh chnong hadooh Tuber.
- Kitæ ki 23 ngut ki wasan hap man ki kiwa dadep yoh tika (COVID-19 Vaccine).
- Waroh ki wasan kiwa ya chimbynta hap deiñ ki yaka Mask khlem pep.
- Da khang pyrchah leh wym hoi u ya e khublei kti namo u yakdup lait tang kiwa Yaslait Niam hapoh Biar Blai (Syiem Aitnar).
- Da khang leh wow chah ya kiwa dai ya ki jait dih wa kiwon kiwon ki jait dai.
- Da khang pyrchah leh wow baam kwai, dih duma, noh jakhlia wei wow mynthu cha madan madiah.
- Waroh ki Seiñ Raij chnong hap pynbiang ki ya ki kyllæn kti (Hand Sanitize).
- Du kitu kiwa da yoh bor naka seiñ kiwa ye wow psiah chapoh i thaw leh niam.
Ka lehniam ynne ka sngi pynsiñ da sdang ko daka ku neiñ heiwa ka phang wah wow ku cha ki phang neiñ, hadien wada yachem ki chirup haphyrdi ka phang neiñ waka phang wah, neiliang ka phang neiñ da yah ko yaki phang wah wow lai yachaad sñiawbha lang ki haki yung yong kiwa jooh ksoh kaam niam yong ka phang neiñ. Haka sngi wa bood won katæ haka 17 tarik, sngi Mulong, ka phang neiñ won u hiar ko cha ki phang wah yow lai ya chaad sñiawbha ki cha ki yung kiwa ksoh kaam niam yong ka phang wah.
Haka sngi wa le yong i leh niam Behdieñkhlam, katæ toh haka 18 tarik sngi Musiang nadooh 5 waje i step u Lyngdoh chirup waki Wasan Ri Raij daw pyndep ki yaka Kñia E Ngooh ya u Syiem Ryngkaw. Hadien neitæ pyn-ar ka phang neiñ waka phang wah u lai ki jar jiar wow li rah ki jar jiar ki Bhang Blai yow pynpoi ki haka Biar Blai (Syiem Aitnar) ha Tuber Kmai Chnong. Hadien wada pynpoi ki ya ki arliang ki Bhang Blai hapoh Syiem Aitnar, u ya chaad lang ki chibet chipor neitæ won u lai lang won ki cha yung u Lyngdoh Ri Blai. Hadien neitæ ya lai ki jar jiar ki dong yow pyndep ki yaka Niam Choh Thyndai yow beh yaka khlam ka dait, ka chitom saja napoh u tnoom u thyndai ki khon ki rayot hapoh ka Raij ka muluk.
Haka sngi wa soo kawa man ka sngi wa khaddooh yong i lehniam katæ toh haka 19 tarik nadooh 5 waje i step, u Lyngdoh waki Wasan daw pyndep ki yaka ka Kñia Beh Khlam bood saka Behdieñkhlam. Neitæ bood sa ka Yaboh wei Yatan Bhang Blai, Yasliat Niam ki Wasan. Ha i por 12 waje i sngi sdang ki Lyngdoh wa ki wasan wow e Khlong Pyrnah cha ki dong kiwa chna Rong kiwa em hapoh ki Seiñ Raij chnong waphær waphær. Heipor 1:00 waje bood saka Yaboh wei Yatan Bhang Blai hapyrdi ki phang wah waki phang neiñ. Hadien wa kut ka Yatan Bhang u sdang ki wow pynchaad yow linoh yaki rong ki rup kiwa da rap jar jiar ki chnong ki thaw. U pynkut yaka Behdieñkhlam daka Yaslait Niam haphyrdi ka phang wah waka phang neiñ.
Katkam i ngait wa da yoh pateiñ naki manchwa longchwa haki ki artylli ki leh niam ka Yatan Bhang waka Yaslait Niam, lada jop ka phang neiñ pynyoo ko daw man u snem uwa miat wa bha nadooh i chait i tram hadooh i thung i tep. Lada jop won daka phang wah man ko wa jem u snem u bnai, la hei chait hei khiah namo i thung i tep.
Ka Bei Seiñ Raij dap ko dei mynsien wa sñiawkmen wow e khublei Behdieñkhlam wasuk wakmen ya phi ki khon ka Seiñ Raij waroh, kamjooh yaki lok ki jor najan wa na jngai, hanla ym yoh phi wow ya mih paidbah leh, chim wa kani ka leh niam kitlang ko ya waroh, wow yoh i dei chait dei tram, yow beh ya kani ka khlam cha wa soo wa sep ka sngi u bnai.
Ka SRT e khublei kyrpang ko leh khamtam ya ki ar ngut ki Deputy Commissioner nadooh yong ka East Jaiñtia Hills District wa ya u Deputy Commissioner ka West Jaiñtia Hills District, pynkut ka kyrwoh Wyrta na u R. Harvis Phawa, President SRT.
