Ynne ka sngi kawa man leh ka sngi wa nyngkong wa da pynkrehkaam biang ya ka Lockdown ha waroh ki District ka jylla Meghalaya hadien chi snem, da man ko leh ka sngi kawa sñiawsih heiwa da em 11 ngut kiwa yap na u COVID-19 heiwa katkam wa yoh yutip, da em 3 ngut kiwa yap kiwa na Jowai heiwa arngut toh kiwa chah sumaar ha Shillong katwa 1 won toh wa chah sumaar ha West Jaiñtia Hills.
Kiwa dang yoh COVID-19 ynne ka sngi da em ki 375 ngut iwa man leh iwa boon dooh ha ka chi sngi wei waroh kiwa da dep yoh ya uni u khñiang hapoh ka jylla da em ki 19,302 ngut, katwa kiwa yap da ku cha ka 210 ngut naka 199 ngut, kiwa dang em ya uni u khñiang da em ki 2678 ngut.
Hawa lai pait yei krehkaam ka Lockdown ha Jowai ynne ka sngi kawa da sdang nadooh ynnin miet, da man ko kawa lai bait heiwa da lyngam ki luti ki singkieñ, ki dukan wa wai toh du ki Pharmacy, ki pulit da em ki wow sylli ya kiwa lai wa wan.
Ka Lockdown ha waroh ki District kawa da e pyrtuid kam ka Weekend Lockdown toh kawa daw kut hei step ka 10 tarik katwa ha East Khasi Hills ynne da pynbna wa daw pteiñ biang ko hadooh i step ka 17 tarik uni u bnai.
